नेपाल नेत्रज्योति सङ्घले निःशुल्क आँखा शिविरमार्फत आफ्नो आँखा उपचार सेवा विदेशमा समेत विस्तार गर्ने अभियानलाई तीव्रता दिएको छ। यसक्रममा सङ्घले कम्बोडियामा पहिलो पटक सञ्चालन गरेको दुईदिने निःशुल्क आँखा उपचार शिविरबाट एक हजार दुई जनाले सेवा लिएका छन्।
लुम्बिनी नेत्रविज्ञान अध्ययन संस्थान तथा रिसर्च सेन्टरको प्राविधिक सहकार्य र थाइल्याण्डस्थित नेपाली राजदूतावास (कम्बोडिया समेत) को समन्वयमा असार २० र २१ गते कम्बोडियाको कम्पोङ चाम प्रान्तीय अस्पतालमा शिविर सञ्चालन गरिएको हो।
सङ्घका कार्यकारी निर्देशक डा. शैलेशकुमार मिश्रका अनुसार शिविरबाट १,००२ जनाले निःशुल्क आँखा परीक्षण तथा उपचार सेवा प्राप्त गरेका छन्। सेवा लिनेमध्ये ६४१ महिला र ३६१ पुरुष रहेका थिए। परीक्षणका क्रममा ३७३ जनालाई निःशुल्क औषधि, ४०७ जनालाई चस्मा तथा १९२ जनालाई औषधिसहित चस्मा वितरण गरिएको थियो। साथै, ९३ जनामा मोतियाबिन्दुको समस्या पहिचान भएपछि थप उपचारका लागि स्थानीय अस्पतालमा रिफर गरिएको छ।
शिविरको उद्घाटन नेपालका कम्बोडियाका लागि राजदूत धनबहादुर ओली र कम्पोङ चाम प्रान्तका गभर्नर उन चान्दाले संयुक्त रूपमा गरेका थिए। शिविरमा लुम्बिनी नेत्रविज्ञान अध्ययन संस्थान तथा रिसर्च सेन्टर (श्री रण अम्बिका शाह आँखा अस्पताल) की चिफ मेडिकल डाइरेक्टर प्रा. डा. सुशीला पटेलको नेतृत्वमा रहेको विशेषज्ञ टोलीले आँखा परीक्षण, उपचार तथा विशेषज्ञ परामर्श सेवा प्रदान गरेको थियो।
शिविरसँगै नेपाल र कम्बोडियाबीच आँखा स्वास्थ्य सेवा, चिकित्सा शिक्षा, प्राविधिक सहयोग, स्वास्थ्यकर्मीको क्षमता अभिवृद्धि तथा ज्ञान–अनुभव आदानप्रदानका विषयमा सहकार्य विस्तार गर्ने सहमति पनि भएको छ।
नेपाल नेत्रज्योति सङ्घले नेपाललाई दक्षिण एसियाकै अग्रणी आँखा उपचार, तालिम तथा आँखा स्वास्थ्य पर्यटनको केन्द्रका रूपमा स्थापित गर्ने दीर्घकालीन लक्ष्यसहित यस्ता अन्तरराष्ट्रिय कार्यक्रमलाई निरन्तरता दिने जनाएको छ।
सङ्घका अनुसार स्थापना भएयता सन् २०२५ को अन्त्यसम्म २८ आँखा अस्पताल, ४४ जिल्ला शाखा र २२६ आँखा उपचार केन्द्रमार्फत नेपाल तथा विभिन्न देशका गरी ५ करोड २ लाखभन्दा बढी बिरामीलाई आँखा उपचार सेवा प्रदान गरिएको छ भने ५६ लाख ५९ हजारभन्दा बढी आँखाको शल्यक्रिया सम्पन्न भइसकेको छ।
Discussion about this post