काठमाण्डौ – खाद्य प्रविधि तथा गुण नियन्त्रण विभागले बालबालिका, गर्भवती, सुत्केरी तथा मधुमेहलगायतका रोग भएका व्यक्तिलाई इनर्जी ड्रिङ्क्स नपिउन आग्रह गरेको छ ।
विभागले स्वस्थ वयस्कलाई समेत इनर्जी ड्रिङ्क्स सेवन गर्दा सावधानी अपनाउन सुझाव दिएको छ । विभागका अनुसार नेपालमा उत्पादित इनर्जी ड्रिङ्क्सको प्रतिक्यानमा १०० मिलिग्राम क्याफिन रहेको छ ।
स्वस्थ वयस्कका लागि सबै खाद्य तथा पेय पदार्थबाट प्राप्त हुने क्याफिनको कुल मात्रा दैनिक ४०० मिलिग्रामसम्म हुन सक्ने वैज्ञानिक आधार रहेको विभागले जनाएको छ ।
विभागले इनर्जी ड्रिङ्क्सलाई पानी, जुस, दूध तथा मोहीजस्ता पेय पदार्थको विकल्पका रूपमा प्रयोग नगर्न र अन्य पेय पदार्थमा मिसाएर नपिउन पनि आग्रह गरेको छ ।
त्यस्तै, उत्पादक तथा विक्रेतालाई आवश्यक अनुमति लिएर मात्र विज्ञापन गर्न र उत्पादनको लेबलमा सुरक्षित उपभोगसम्बन्धी चेतावनी स्पष्ट राख्न निर्देशन दिइएको छ । नियमविपरीत काम गर्ने व्यवसायीलाई कानुनअनुसार कारबाही गरिने विभागले जनाएको छ ।
Discussion about this post