भरतपुर अस्पताल न्यूनतम सेवा मापदण्ड (एमएसएस) मूल्याङ्कनमा देशकै उत्कृष्ट सङ्घीय अस्पताल बनेको छ।
स्वास्थ्य तथा खाद्य स्वच्छता मन्त्रालयअन्तर्गत गुणस्तर मापन तथा नियमन महाशाखाले गरेको अनुगमन तथा मूल्याङ्कनमा भरतपुर अस्पतालले ८९ अङ्क प्राप्त गर्दै पहिलो स्थान हासिल गरेको हो।
त्यसैगरी बीपी कोइराला स्वास्थ्य विज्ञान प्रतिष्ठान, धरान ७७ अङ्कसहित दोस्रो र पोखरा स्वास्थ्य विज्ञान प्रतिष्ठान ७१ अङ्कसहित तेस्रो भएका छन्। पाटन अस्पतालको मूल्याङ्कन प्रक्रिया भने जारी रहेको मन्त्रालयले जनाएको छ।
महाशाखाका संयोजक डा. श्रीराम तिवारीका अनुसार देशभरका १४ सङ्घीय अस्पतालको सेवा गुणस्तर मापन १ हजार ४ सय ९७ सूचकका आधारमा गरिएको हो। भरतपुर अस्पतालले गत वर्ष ८८ अङ्क प्राप्त गरेको थियो भने यस वर्ष थप सुधार गर्दै उत्कृष्ट स्थान कायम राखेको हो।
अस्पतालका प्रमुख मेडिकल सुपरिटेन्डेन्ट डा. विश्वबन्धु बगालेले सेवा गुणस्तर, उपकरण व्यवस्थापन, सरसफाइ, औषधि आपूर्ति र जनशक्ति व्यवस्थापनमा सुधारका कारण राम्रो नतिजा आएको बताउनुभयो।
६ सय शय्याको भरतपुर अस्पतालमा दैनिक २ हजार ५ सयदेखि ३ हजारसम्म बिरामीले बहिरङ्ग सेवा लिने गरेका छन्। अस्पतालले १४ वटा अतिविशिष्ट सेवा सञ्चालन गर्दै आएको छ। स्वास्थ्य बिमा सेवासम्बन्धी परिवर्तनपछि बिरामीको चाप अझै बढेको अस्पतालले जनाएको छ।
Discussion about this post