स्वास्थ्य बीमा बोर्डले देशभरका २०२ सेवा प्रदायक अस्पताललाई स्वास्थ्य बीमा दाबीबापत थप ९१ करोड १८ लाख ९४ हजार रुपैयाँ भुक्तानी गर्ने प्रक्रिया अघि बढाएको छ।
स्वास्थ्य तथा खाद्य स्वच्छता मन्त्रालयले स्वास्थ्य बीमा तथा विपन्न नागरिक औषधि उपचार कार्यक्रमअन्तर्गत बाँकी दायित्व भुक्तानीलाई प्राथमिकतामा राख्दै रकम निकासा सहजीकरण गरिरहेको जनाएको छ।
मन्त्रालयका सहप्रवक्ता डा. समीरकुमार अधिकारीका अनुसार यसअघि जेठको दोस्रो सातामै स्वास्थ्य बीमा दाबीबापत एक अर्ब ३ करोड २४ लाख ७७ हजार रुपैयाँ भुक्तानी गरिएको थियो।
यस्तै, विपन्न नागरिकको औषधि उपचार खर्चअन्तर्गत जेठ २१ गते ३२ करोड १३ लाख ६ हजार रुपैयाँ निकासा गरिएको थियो भने जेठ २७ गते थप २७ करोड ३७ लाख ७८ हजार रुपैयाँ भुक्तानी गरिएको उनले जानकारी दिए।
हाल मङ्सिरसम्मको स्वास्थ्य बीमा दाबीमध्ये करिब ७ अर्ब रुपैयाँ भुक्तानी हुन बाँकी रहेको छ। साथै पुसदेखि असारसम्मको दाबी भुक्तानीका लागि थप साढे १४ अर्ब रुपैयाँ आवश्यक पर्ने अनुमान गरिएको मन्त्रालयले जनाएको छ।
सहप्रवक्ता अधिकारीका अनुसार सरकारले विगतदेखि बाँकी रहेका स्वास्थ्य बीमा दाबी तथा विपन्न नागरिकको औषधि उपचारसम्बन्धी रकम भुक्तानीलाई उच्च प्राथमिकतामा राखेको छ। आवश्यक स्रोत व्यवस्थापन गर्दै भुक्तानी प्रक्रियालाई थप तीव्र बनाइएको मन्त्रालयको भनाइ छ।
Discussion about this post