काठमाण्डौ । काठमाण्डौ उपत्यकासहित पश्चिमी नेपालका धेरै ठाउँमा रातिदेखि वर्षा भइरहेको छ। मौसम पूर्वानुमान महाशाखाका अनुसार काठमाण्डौमा दिउँसोपछि वर्षा कम हुँदै मौसममा सुधार आउनेछ भने पश्चिमी क्षेत्रमा आज दिनभर वर्षा हुन सक्नेछ।
कोशी र मधेश प्रदेशमा भने वर्षा रोकिएर मौसममा सुधार आएको छ। पश्चिमी क्षेत्रमा पनि बिहानदेखि वर्षाको मात्रा केही घटेको मौसमविद्ले बताएका छन्।
चितवन, तनहुँ, नवलपरासी, रुपन्देही, कपिलवस्तु, स्याङ्जा, पाल्पा, गुल्मी, बागलुङ, म्याग्दी, पर्वत र कास्की लगायतका क्षेत्रमा ठूलो वर्षा भएको थियो। वर्षाका कारण नारायणी, तिनाउलगायत नदी तथा खोलामा जलसतह बढेकाले सतर्कता अपनाउन आग्रह गरिएको छ।
मौसमविद्का अनुसार बङ्गालको खाडीमा विकसित न्यूनचापीय प्रणाली कमजोर हुँदै गएको छ। कोशी, मधेश र बागमतीमा यसको प्रभाव क्रमशः घट्दै गएको छ भने गण्डकी, लुम्बिनी, कर्णाली र सुदूरपश्चिममा आज पनि वर्षा हुने सम्भावना छ।
चितवनको नारायणी नदीदेखि पश्चिमका क्षेत्रमा भोलिदेखि मौसम क्रमशः खुल्दै जाने र पर्सिसम्ममा पूर्ण सुधार हुने अनुमान गरिएको छ। यसबीच पश्चिम नेपालका जोखिमयुक्त क्षेत्रमा अनावश्यक यात्रा नगर्न तथा नदी किनारमा विशेष सावधानी अपनाउन महाशाखाले आग्रह गरेको छ।
Discussion about this post