कञ्चनपुर । मनसुन भित्रिएसँगै हुन सक्ने सम्भावित प्राकृतिक जोखिम र क्षतिलाई न्यूनीकरण गर्ने उद्देश्यका साथ कञ्चनपुरको दोधारा चाँदनी नगरपालिका वडा नम्बर -८ सुन्दरनगरमा बाढी पूर्वानुमानमा आधारित अग्रिम प्रतिकार्यका लागि विपद् पूर्वतयारी सम्बन्धी सचेतनामूलक सडक नाटक प्रदर्शन गरिएको छ।
सुन्दर प्रकृति सामुदायिक विपद् व्यवस्थापन समितिको आयोजना तथा नेपाल राष्ट्रिय समाज कल्याण सङ्घ (एनएनएसडब्लुए) र डीसीए नेपालद्वारा संयुक्त रूपमा सञ्चालित ‘सुदृढ’ परियोजनाको आर्थिक तथा प्राविधिक सहयोगमा उक्त सडक नाटक प्रदर्शन गरिएको हो।
प्रत्येक वर्ष मनसुनको समयमा जगबुडा नदीका कारण उक्त क्षेत्रका बासिन्दा ठूलो मात्रामा कटान र डुबानको समस्या भोग्दै आइरहेका छन्। जसका कारण स्थानीय बासिन्दाहरूले धनजनको ठूलो क्षति ब्यहोर्नुका साथै विस्थापनको पीडा समेत झेल्दै आइरहेका छन्।
समुदायलाई बाढी आउनु अगावै वैज्ञानिक पूर्वानुमानका आधारमा कसरी सुरक्षित स्थानतर्फ स्थानान्तरण हुने, आफ्ना महत्त्वपूर्ण कागजात, खाद्यान्न र पशुचौपायालाई कसरी जोगाउने र पूर्वसूचना प्रणालीलाई कसरी पछ्याउने, विपद् आउनुपूर्व नै गरिने पूर्वकार्यले कसरी समुदायको जीवन र जीविकोपार्जन बचाउन सक्छ लगायतका विषयमा नाटकका माध्यमबाट बुझाइएको सुदृढ परियोजनाकी सामाजिक परिचालिका निर्मला सुनारले जानकारी दिनुभयो।
Discussion about this post