कञ्चनपुर । वर्षायाम सुरु हुनै लाग्दा बाढीको उच्च जोखिममा रहेको कञ्चनपुरको महाकाली नदीमा सुरक्षा निकाय र विभिन्न संघसंस्थाहरूको सहकार्यमा बाढी विपद् पूर्वतयारी संयुक्त कृत्रिम नमूना अभ्यास प्रदर्शन गरिएको छ। भीमदत्त नगरपालिकास्थित महाकाली नदीको तटीय क्षेत्रमा श्री वराहदल गुल्म भगतपुर ब्यारेकको आयोजनामा संयुक्त अभ्यास प्रदर्शन गरिएको हो।
जिल्ला प्रशासन कार्यालय कञ्चनपुर, सशस्त्र प्रहरी बल नेपाल नम्बर ३५ गण हेडक्वार्टर कञ्चनपुर, नेपाल राष्ट्रिय समाज कल्याण संघ (एनएनएसडब्लुए), निड्स नेपाल र नेपाल रेडक्रस सोसाइटी लगायतका विभिन्न सरोकारवाला संघसंस्थाहरूको सक्रिय सहकार्यमा यो अभ्यास सम्पन्न भएको हो। अभ्यासमा स्थानीय तहका प्रतिनिधि, उत्थानशील युवा सञ्जाल र सामुदायिक विपद् व्यावस्थापन समितिका प्रतिनिधिको समेत सहभागिता रहेको थियो।
वर्षेनी आउने बाढीका कारण नदी तटीय क्षेत्रमा ठूलो जनधनको क्षति बेहोर्नुपर्ने अवस्थालाई मध्यनजर गर्दै, विपद्को समयमा कसरी सुरक्षित रहने र क्षति न्यूनीकरण कसरी गर्ने भन्नेबारे सर्वसाधारणमा जनचेतना जगाउने उद्देश्यले यो अभ्यास प्रदर्शन गरिएको हो।जिल्ला समन्वय समिति कञ्चनपुरका प्रमुख दुर्गा दत्त बोहराको प्रमुख आतिथ्यता तथा कञ्चनपुरका प्रमुख जिल्ला अधिकारी मदन कोइरालाको अध्यक्षतामा आयोजित उक्त कार्यक्रममा बाढी तथा प्राकृतिक प्रकोपको बेला जोखिममा परेका व्यक्तिहरूलाई जल सुरक्षाका आधुनिक साधन प्रयोग गरी कसरी उद्धार गर्ने, धनजनको क्षति कम गर्न कसरी सावधानी अपनाउने र घाइतेहरूलाई तत्काल प्राथमिक उपचार दिई कसरी सुरक्षित रूपमा अस्पतालसम्म पुर्याउने भन्नेबारे प्रत्यक्ष नमूना प्रदर्शन गरिएको थियो।
कञ्चनपुरका प्रमुख जिल्ला अधिकारी मदन कोइरालाले जिल्लामा भविष्यमा घट्न सक्ने प्राकृतिक तथा मानव सिर्जित विपद्का घटनाहरूलाई समयमै सम्बोधन गर्न यस कार्यक्रमले ठूलो सहयोग पुर्याउने बताउनुभयो। उहाँले विपद्का घटना जुनसुकै बेला पनि घट्न सक्ने भएकाले सरकारी निकाय, सुरक्षा निकाय, स्थानीय तह र नागरिक समाज सबैले सघन सहकार्य र समन्वय गर्दै अगाडि बढ्नुपर्नेमा जोड दिनुभयो।
साथै, प्रमुख जिल्ला अधिकारी कोइरालाले यस नमूना अभ्यासको मुख्य उद्देश्य नै स्थानीय प्रशासन, सुरक्षा निकाय र अन्य सरोकारवाला निकायहरूबीचको समन्वय, सहकार्य र तत्परतालाई थप सुदृढ बनाउनु रहेको उल्लेख गर्नुभयो। उहाँले यस अभ्यासले वास्तविक विपद्को समयमा कसरी छिटो, सुरक्षित र प्रभावकारी ढङ्गले प्रतिकार्य गर्ने भन्ने विषयमा सरोकारवालाहरूलाई व्यावहारिक ज्ञान र अनुभव आदान-प्रदान गर्न महत्वपूर्ण भूमिका खेलेको बताउनुभयो।
मनसुन सुरु हुनुपूर्व महाकाली नदीको किनारमै पुगेर गरिएको यस किसिमको संयुक्त अभ्यासले जिल्लाको समग्र आपतकालीन उद्धार प्रणालीलाई थप चुस्त र तयारी अवस्थामा राख्न मद्दत पुर्याउने विश्वास लिइएको छ। कार्यक्रममा स्थानीय जनप्रतिनिधि, सुरक्षा निकायका प्रमुखहरू, सामाजिक संघसंस्थाका प्रतिनिधि र स्थानीय बासिन्दाहरूको उपस्थिति रहेको थियो।
Discussion about this post