काठमाण्डौ ( आज अन्तर्राष्ट्रिय आरोग्य दिवस, विभिन्न कार्यक्रम गरी मनाईंदैछ । नेपालको विशेष पहल र प्रस्तावमा संयुक्त राष्ट्रसंघले अन्तर्राष्ट्रिय आरोग्य दिवस घोषणा गरेपछि आज पहिलो पटक यो दिवस मनाउन लागिएको हो ।
समग्र स्वास्थ्य, सुख र सन्तुलित जीवनशैली प्रवर्द्धन गर्ने उद्देश्यले राष्ट्रसङ्घको महासभाले अप्रिल १५ तारिखलाई अन्तर्राष्ट्रिय आरोग्य दिवसका रूपमा घोषणा गरेको हो ।
हरेक वर्ष आरोग्य दिवस मनाउन नेपालले गरेको प्रस्तावलाई महासभाले गएको फागुन २६ मा अनुमोदन गरेको थियो । सस्तो, सुलभ र समावेशी स्वास्थ्य अभ्यास अवलम्बन गर्न सबैलाई प्रेरित गर्नु यो दिवसको लक्ष्य हो ।
रोग लागेपछि उपचार गर्नेभन्दा रोग लाग्नै नदिने निवारणमुखी उपाय, स्वस्थ जीवनशैली र मानिस केन्द्रित स्वास्थ्य प्रणालीमार्फत जीवन रक्षा, स्वास्थ्य खर्च न्यूनीकरण तथा रोकथामयोग्य रोग नियन्त्रणमा महत्त्वपूर्ण योगदान पुग्ने विश्वास गरिएको छ ।
संयुक्त राष्ट्रसङ्घले आदिवासी जनजाति र स्थानीय समुदायका संस्कृतिहरू तथा परम्परागत ज्ञानको महत्त्वलाई स्वीकार गर्दै प्रमाणमा आधारित परम्परागत चिकित्सापद्धतिले स्वास्थ्य प्रणाली सुदृढ बनाउन र समग्र स्वास्थ्य प्रवद्र्धनमा योगदान पुर्याउने उल्लेख गरेको छ ।
राष्ट्रसङ्घका अनुसार यो दिवसले विश्वभर जनचेतना अभिवृद्धि, सांस्कृतिक आदानप्रदान र ज्ञान साझेदारीका लागि मञ्च प्रदान गर्ने उद्देश्य राखेको छ । दिवसको अवसरमा काठमाण्डौको सैनिक मञ्च टुँडिखेल आज बिहान विशेष कार्यक्रम गरिएको छ । संस्कृति, पर्यटन तथा नागरिक उड्डयन मन्त्रालयले विशेष समारोहको आयोजना गरेको हो ।
Discussion about this post