बाजुरा । केही दिनदेखिको लगातार वर्षापछि मौसममा सुधार आएसँगै बाजुराको जनजीवन क्रमशः सामान्य बन्दै गएको छ।
आकाश खुल्दै घाम लाग्न थालेपछि बजार, विद्यालय, सरकारी कार्यालय तथा यातायात सेवा नियमित हुन थालेका छन्। वर्षाका कारण अवरुद्ध भएका केही ग्रामीण सडकमा पनि सवारीसाधन सञ्चालनमा आएका छन्।
साँफे–मार्तडी सडकखण्डमा पहिरो पन्छाएपछि आइतबारदेखि यातायात सेवा पुनः सञ्चालन भएको जिल्ला प्रहरी कार्यालयले जनाएको छ। लामो तथा छोटो दूरीका सवारीसाधन पनि नियमित हुन थालेका छन्।
मौसममा सुधार आएसँगै किसानहरू खेतबारीको काममा फर्किएका छन्। वर्षाका कारण रोकिएको धान काट्ने लगायतका कृषि कार्य पुनः सुरु भएको स्थानीय वीरबहादुर बुढाले बताए।
प्रमुख जिल्ला अधिकारी डोरेन्द्र निरौलाका अनुसार मौसममा सुधार हुँदै गएसँगै जिल्लाको जनजीवन पनि सामान्य बन्दै गएको छ। उनका अनुसार लामो तथा छोटो दूरीका यातायात सेवा आइतबारदेखि नै सञ्चालनमा आएका छन्।
Discussion about this post