कञ्चनपुर । सुदूरपश्चिममा विशेष महत्वका साथ मनाइने पर्व ‘पुसे पन्ध्र’ मनाइएको छ। वसन्त ऋतुको आगमनतर्फ उन्मुख भएको संकेत दिने र महिनाको मध्यदिन पुस पन्ध्र यस दिनलाई सुदूरपश्चिमेलीहरूले परम्परागत पर्वका रूपमा मनाउँदै आएका छन्।
पुसे पन्ध्रको अवसरमा गाउँका सबै एक ठाउँमा भेला भएर रातभर आगो ताप्दै जाग्राम बस्ने, तरुल, पिँडालु, सखरखण्डलगायतका कन्दमूल तथा विभिन्न परिकार खाने चलन रहेको छ। हरेक वर्ष पुस १५ गते सुदूरपश्चिममा सामाजिक एकता र संस्कृतिको प्रतीकका रूपमा यो पर्व मनाइन्छ।
यसै अवसरमा उत्थानशील युवा सञ्जालले अनाथ बालबालिकासँग मिलेर पुसे पन्ध्र मनाएको छ। सञ्जालले अनाथ बालबालिकालाई तरुल, विभिन्न परिकार खुवाउँदै गीत गाउँदै रमाइलो वातावरणमा दिनभर पर्व मनाएको हो।
उत्थानशील युवा सञ्जालकी सदस्य कविता गौडले अनाथ बालबालिकाले आफू एक्लो छैनन् भन्ने अनुभूति गरून् भन्ने उद्देश्यले कार्यक्रम आयोजना गरिएको बताइन्। “पर्वका दिन कसैलाई पनि एक्लोपन महसुस नहोस् भन्ने हाम्रो चाहना हो। उनीहरूलाई साथ, माया र खुशी दिन सकेकैमा हामी सन्तुष्ट छौं,” उनले भनिन्।
नेपाल राष्ट्रिय समाज कल्याण संघ (एनएनएसडब्ल्यूए) का वातावरणविद् भोजराज भट्टले पुसे पन्ध्रजस्ता पर्वले सामाजिक सम्बन्ध मजबुत बनाउनुका साथै स्थानीय संस्कृति र वातावरणीय सन्तुलनप्रति सचेत गराउने बताए। उनले यस्ता पर्वहरूले पुस्तान्तरणमार्फत संस्कृति जोगाउन महत्वपूर्ण भूमिका खेल्ने उल्लेख गरे।
कार्यक्रमले अनाथ बालबालिकामा खुशी र आत्मीयता थप्नुका साथै सामाजिक उत्तरदायित्व र मानवीय संवेदनाको सन्देश प्रवाह गरेको सहभागीहरूले बताएका छन्।
Discussion about this post