कञ्चनपुर । कञ्चनपुरको दोधाराचाँदनी नगरपालिकामा २०८२ सालको मनसुन अवधिभरका विपद् प्रतिकार्य गतिविधिको समिक्षा गर्न आयोजित ‘विपद् प्रतिकार्य समिक्षा कार्यक्रम–२०८२’ सम्पन्न भएको छ। दोधाराचाँदनी नगरपालिका, नेपाल राष्ट्रिय समाज कल्याण संघ (एनएनएसडब्लुए), मर्सिकोर नेपाल तथा क्लाइमेट रेजिलेन्स अलायन्स र डिसिएको सहकार्यमा कार्यक्रम सम्पन्न गरिएको हो।
कार्यक्रममा यस वर्षको मनसुनअघि गरिएका पूर्वतयारी, मनसुनका क्रममा देखिएका चुनौती, सिकाइ तथा आगामी वर्ष थप प्रभावकारी प्रतिकार्यका लागि के-कस्ता कदम चाल्न सकिन्छ भन्ने विषयमा विस्तृत छलफल गरिएको थियो।
एनएनएसडब्लुएका निमित्त कार्यकारी प्रमुख बिनोद बिक्रम जैरुले मनसुनपूर्व गरिएका तयारी, सुधार आवश्यक पक्षहरू तथा आगामी वर्षका सम्भावित योजनाहरूको समिक्षा गरिएको जानकारी दिए। उनले भने, “मनसुन सुरु हुनु पहिले के–कस्ता तयारी गर्यौँ, कहाँ–कहाँ कमजोरी देखियो र अब के सुधार गर्नुपर्छ भन्ने विषयमा विस्तृत समिक्षा भयो।”
त्यस्तै मर्सिकोर नेपालका सुदूरपश्चिम प्रदेश संयोजक नवीन चन्द्र जोशीले २०८२ सालको बाढीसँग सम्बन्धित पूर्वतयारी र प्रतिकार्यका विषयमा समिक्षा गर्दै आगामी वर्षका लागि प्रभावकारी रणनीति निर्माण गर्ने उद्देश्य कार्यक्रमले पूरा गरेको बताए। “गत वर्षका अनुभवले धेरै सिकाइ दिएका छन्, तिनलाई आधार बनाएर अबको रणनीति बनाइँदैछ,” उनले भने।
एनएनएसडब्लुएद्वारा सञ्चालित सुदृढ परियोजनाका संयोजक राजकुमार सुनारले २०८२ सालको मनसुनको अवस्थासँगै विपद् व्यवस्थापनमा आवद्ध संस्थाहरूले पुर्याएको भूमिका र सुधार आवश्यक पक्षबारे समिक्षा गरिएको बताए।
दोधाराचाँदनीका नगर प्रमुख किशोर लिम्बुले विपद् प्रतिकार्यमा सक्रिय रूपमा सहयोग गर्दै आएका सबै संस्थाप्रति धन्यवाद ज्ञापन गर्दै आगामी वर्ष अझ समन्वित ढंगले काम गर्ने प्रतिबद्धता व्यक्त गरेका थिए।
कार्यक्रमकामा समुदायका लागि जलवायू उत्थानशील परियोजनाका संयोजक महेश घीमिरेले २०८२ सालको मनसुन र विपद्को अवस्थाबारे विस्तृत प्रस्तुतिकरण गरे भने मर्सिकोर नेपालका विपद् जोखिम व्यवस्थापन विज्ञ बिराज पोख्रेलले विपद् प्रतिकार्य समिक्षाको आवश्यकता र महत्त्वबारे प्राविधिक प्रस्तुति दिएका थिए।
दोधाराचाँदनी नगरपालिकाका विपद् सम्पर्क व्यक्ति अमृत बिकले सञ्चालन गरेको उक्त कार्यक्रममा सुरक्षा निकायका प्रतिनिधि, विभिन्न संस्थाहरूका प्रतिनिधि तथा विपद् व्यवस्थापनमा संलग्न व्यक्तिहरूको सक्रिय सहभागिता रहेको थियो।
Discussion about this post