वेदकोट-९ ले जित्यो मेयर कपको उपाधि, खेलकुद विकासमा नगरपालिकाको निरन्तरता

कञ्चनपुर । वेदकोट नगरपालिकामा कार्तिक १४ गतेदेखि सुरु भएको नगर स्तरीय तेस्रो मेयर कप फुटबल प्रतियोगिता–२०८२ कार्तिक २४ गते सम्पन्न भएको छ। फाइनल प्रतिस्पर्धामा वेदकोट-९ ले वेदकोट-३ लाई पेनाल्टी सुटआउटमा ४-३ को गोलको अन्तरले पराजित गर्दै मेयर कपको उपाधि जितेको छ।

प्रतियोगितामा ९ वटा टिमको सहभागिता रहेको थियो। विजेता वेदकोट-९ ले नगद रु ५०,१२५ सहित ट्रफी, मेडल र प्रमाणपत्र प्राप्त गरेको छ भने उपविजेता वेदकोट-३ ले नगद रु २२,१२५ सहित ट्रफी, मेडल र प्रमाणपत्र प्राप्त गरेको छ। यसैगरी, प्रतियोगिताका उत्कृष्ट खेलाडीहरूलाई समेत पुरस्कृत गरिएको थियो।

समापन कार्यक्रमका प्रमुख अतिथी नगर प्रमुख भोजराज बोहराले आर्थिक तथा भौतिक चुनौतीहरूका बाबजुद पनि वेदकोट नगरपालिकाले खेलकुद क्षेत्रको विकासमा निरन्तरता दिइरहेको बताउनुभयो। उहाँले पछिल्लो समय सम्पन्न विभिन्न प्रतियोगिताहरूले खेलप्रति युवाहरूको आकर्षण बढाएको उल्लेख गर्नुभयो। उहाँले भन्नुभयो, “खेलकुदले युवाहरूलाई रचनात्मक र अनुशासित बनाउँछ। हामीले आगामी वर्षहरूमा अझ भव्य रूपमा मेयर कप सञ्चालन गर्ने योजना बनाएका छौँ।”

त्यस्तै वेदकोट नगरपालिका वडा नम्बर -५ का वडा अध्यक्ष तथा कार्यक्रमका सभापति चित्र देव भट्टले पनि नगरपालिकाले खेलकुदलाई दिएको प्राथमिकताको प्रशंसा गर्दै यसले स्थानीय स्तरमा खेलाडी उत्पादन गर्न मद्दत पुगेको धारणा व्यक्त गर्नुभयो।

कार्यक्रममा वेदकोट नगरपालिकाका नगर उपप्रमुख तुलसी जोशी प्रमुख अतिथि रहनुभएको थियो। त्यस्तै जनप्रतिनिधी, स्थानीय लगायतको भव्य उपस्थिती रहेको थियो।

शान्तिपूर्ण र उत्साहजनक रूपमा सम्पन्न भएको यस प्रतियोगिताले वेदकोट क्षेत्रका युवाहरूलाई खेलकुदमा जोड्न थप प्रेरणा दिएको छ।