धनगढी: धनगढी उपमहानगरपालिकाले जेन-जी आन्दोलनमा शहीद भएकाहरूलाई सम्मान गर्दै एक सडकको नाम ‘जेन्जी मार्ग’ राख्ने प्रस्ताव गरेको छ। नगर प्रमुख गोपाल हमालले आफ्नो सामाजिक सञ्जालमार्फत यो जानकारी गराएका हुन्।
मेयर हमालले जेन-जी आन्दोलनका शहीदहरूलाई भावपूर्ण श्रद्धाञ्जली अर्पण गर्दै उनीहरूको बलिदानलाई सम्मान गर्न यो कदम चालिएको बताएका छन्। उनले लेखेका छन्, “तपाईँहरूको बलिदान केवल इतिहासको पानामा मात्र सीमित नभई यो देशका प्रत्येक युवाको मुटुमा दीप बनेर जलिरहनेछ।”
प्रस्तावअनुसार, धनगढी-१ को जोशी मेडिकल चोकबाट पार्क मोडको कबर्ड हल हुँदै शहीद गेट क्याम्पस रोडसम्म जोड्ने सडकलाई ‘जेन्जी मार्ग’ नाम दिइनेछ। हाल यो क्षेत्र धनगढी उपमहानगरपालिकाद्वारा सञ्चालित महिला उद्यम बजारका लागि परिचित छ।
मेयर हमालले उक्त सडकको नामाकरणका लागि कार्यपालिका बैठकमा प्रस्ताव लैजाने जानकारी दिएका छन्। साथै, उनले सम्पूर्ण नगरवासीलाई उक्त सडकलाई ‘जेन्जी मार्ग’ भनी सम्बोधन गर्न अपील पनि गरेका छन्।
Discussion about this post