वेदकोटमा तीन महिने सिलाई कटाई तालिम सम्पन्न, २० जनालाई प्रमाणपत्र वितरण

कञ्चनपुर। कञ्चनपुरको वेदकोट नगरपालिका वडा नम्बर ९ मा सीप विकास कार्यालय कञ्चनपुरको सहयोगमा सञ्चालित तीन महिने सिलाई कटाई तालिम सम्पन्न भएको छ। तालिममा सहभागी २० जना महिलालाई बुधबार एक कार्यक्रमका बीच प्रमाणपत्र वितरण गरिएको छ।

वेदकोट नगरपालिका वडा नम्बर ९ का कार्यवाहक वडा अध्यक्ष पार्वती बिष्टको सभाअध्यक्षतामा सम्पन्न कार्यक्रममा वेदकोट नगरपालिकाका नगर प्रमुख भोजराज बोहरा प्रमुख अतिथि रहनुभएको थियो।

कार्यक्रममा बोल्दै नगर प्रमुख भोजराज बोहराले महिलाहरूलाई उद्यमशील बन्न प्रोत्साहन गर्दै नगरपालिकाले सधैँ सहयोग गर्ने प्रतिबद्धता व्यक्त गर्नुभयो। उहाँले अब नगरपालिकाका सबै वडालाई समेट्ने गरी एडभान्स सिलाई कटाई तालिम समेत सञ्चालन गरिने जानकारी गराउनुभयो।

त्यस्तै कार्यवाहक वडा अध्यक्ष पार्वती बिष्टले पनि तालिमको सफलतामा खुसी व्यक्त गर्दै सहभागीहरूलाई प्राप्त सीपको सदुपयोग गरी आत्मनिर्भर बन्न आग्रह गर्नुभयो।

कार्यक्रममा नगर उपप्रमुख तुलसी जोशी, सीप विकास कार्यालयका प्रतिनिधि, वडा सदस्यहरू, इन्द्रेणी सहकारीका व्यवस्थापक, नगर प्रमुखको सचिवालयका प्रमुख लगायत सम्बन्धित सरोकारवालाहरूको बाक्लो उपस्थिति रहेको थियो।