कञ्चनपुर । स्वच्छ खानेपानीको महत्त्व र व्यक्तिगत सरसफाइको अपरिहार्यतालाई जनसमुदायमाझ पुर्याउने उद्देश्यका साथ कञ्चनपुरको वेदकोट नगरपालिका वडा नम्बर -९ सुन्दरपुरमा रहेको बैजनाथ सुडा खानेपानी उपभोक्ता तथा सरसफाई समितिले बृहत् जनचेतनामूलक अन्तरक्रिया कार्यक्रम सम्पन्न गरेको छ।
शनिबार सुन्दरपुरस्थित उदयदेव माध्यमिक विद्यालयको हलमा आयोजित उक्त कार्यक्रममा स्थानीय बासिन्दा, खानेपानी समितिका पदाधिकारी, वडा प्रतिनिधि, र विभिन्न संघसंस्थाका प्रतिनिधिहरूको उल्लेख्य सहभागिता रहेको थियो। कार्यक्रमको सभापतित्व बैजनाथ सुडा खानेपानी उपभोक्ता तथा सरसफाई समितिका अध्यक्ष पदम सिंह कुँवरले गर्नुभएको थियो भने वेदकोट-९ का कार्यवाहक वडा अध्यक्ष पार्वती बिष्ट प्रमुख अतिथि रहनुभएको थियो।
कार्यक्रमको मुख्य आकर्षणका रूपमा निडस् नेपालका सुरक्षित आवास कार्यक्रमका संयोजक सरस्वती पुरी बमले प्रस्तुत गर्नुभएको गहन प्रशिक्षण रहेको थियो। उहाँले खानेपानीको स्रोत संरक्षण, पानी शुद्धीकरणका घरेलु विधिहरू, पानीको समुचित प्रयोग, र व्यक्तिगत तथा वातावरणीय सरसफाइको महत्त्वबारे विस्तृत प्रस्तुति दिनुभएको थियो। सहभागीहरूले पानीजन्य रोगहरूबाट बच्ने उपायहरू, शौचालयको सही प्रयोग र फोहरमैला व्यवस्थापनका बारेमा पनि जानकारी प्राप्त गरे।
कार्यक्रममा बोल्दै बैजनाथ सुडा खानेपानी उपभोक्ता तथा सरसफाई समितिका अध्यक्ष पदम सिंह कुँवरले स्वच्छ खानेपानी हरेक नागरिकको मौलिक अधिकार भएको र यसको सुनिश्चितताका लागि समिति निरन्तर प्रयासरत रहेको बताउनुभयो। उहाँले भन्नुभयो, “हामीले खानेपानीको गुणस्तर कायम राख्न नियमित परीक्षण गरिरहेका छौँ र कुनै पनि समस्या आएमा तत्काल समाधानका लागि पहल गरिरहेका छौँ। यस्ता जनचेतनामूलक कार्यक्रमहरूले समुदायलाई अझ जिम्मेवार बनाउन मद्दत गर्छ।” उहाँले समितिको पहलमा यस क्षेत्रमा खानेपानीको आपूर्ति र गुणस्तर सुधारका लागि भइरहेका विभिन्न परियोजनाहरूबारे पनि जानकारी गराउनुभयो।
त्यसैगरी, कार्यक्रमका प्रमुख अतिथि तथा वेदकोट-९ का कार्यवाहक वडा अध्यक्ष पार्वती बिष्टले खानेपानी सुरक्षा र सरसफाइका लागि स्थानीय समुदायको सक्रिय सहभागिता अपरिहार्य रहेकोमा जोड दिनुभयो। उहाँले यस कार्यक्रमले स्थानीय स्तरमा जनस्वास्थ्य सुधारमा महत्त्वपूर्ण योगदान पुर्याउने विश्वास व्यक्त गर्नुभयो।
कार्यक्रममा सहभागी स्थानीयहरूले यस्ता जनचेतनामूलक कार्यक्रमहरूबाट आफूहरूले धेरै महत्त्वपूर्ण जानकारी पाएको र यसलाई व्यवहारमा उतार्ने प्रतिबद्धता व्यक्त गरेका थिए। यस कार्यक्रमले वेदकोट-९ का बासिन्दामा खानेपानीको सुरक्षा र सरसफाइप्रतिको सचेतना अभिवृद्धि गर्न महत्त्वपूर्ण भूमिका खेलेको विश्वास गरिएको छ।
Discussion about this post