कञ्चनपुरको बेलौरी नगरपालिका पूर्ण खोप सुनिश्चितता तथा दिगोपन घोषणा

माधब पौडेल, कञ्चनपुर । पूर्ण खोप सुनिश्चितता तथा दिगोपनाको राष्ट्रिय अभियान अन्तर्गत कञ्चनपुरका स्थानीय तहलाई लक्षित उमेर समूहका सबै बालबालिकाले नियमित रूपमा खोप सेवा प्राप्त गरिसकेको पुष्टि भएपछि मङ्गलबार बेलौरी नगरपालिकालाई औपचारिक रूपमा पूर्ण खोप सुनिश्चितता तथा दिगोपना घोषणा गरिएको हो।

बेलौरी नगरपालिकाको सभाहलमा आयोजित विशेष समारोहमा जिल्ला समन्वय समिति कञ्चनपुरका प्रमुख एवं जिल्ला पूर्ण खोप समन्वय समितिका संयोजक दुर्गादत्त बोहराले बेलौरी नगरपालिकाका नगरप्रमुख पोतिलाल चौधरीलाई प्रमाणपत्र हस्तान्तरण गर्दै पालिकालाई पूर्ण खोप सुनिश्चितता तथा दिगोपना सम्पन्न घोषणा गर्नुभयो ।कार्यक्रमको स्वागत मन्तव्य बेलौरी नगरपालिकाको स्वास्थ्य शाखामा कार्यरत सिअहेब मानबहादुर चन्दले राख्नुभएको थियो।

शुभकामना मन्त्यब बेलौरी नगरपालिका वडा नम्बर ७ का वडाध्यक्ष प्रकाश श्रेष्ठले दिनुभएको थियो।कार्यक्रममा बोल्दै कार्यक्रमका प्रमुख अतिथि एवं जिल्ला समन्वय समितिका सभापति दुर्गा बोहराले पूर्ण खोप अभियान सफल बनाउन लाग्नुहुने स्वास्थ्यकर्मी, महिला स्वास्थ्य स्वयंसेविका लगायत नगरपालिकालाई बधाई तथा शुभकामना व्यक्त गर्दै लागू औषध नियन्त्रणका लागि पहल गर्न आवश्यक रहेको बताउनुभयो।

बेलौरी नगरपालिकाका नगर प्रमुख पोतिलाल चौधरीले स्वास्थ्यकर्मी, महिला स्वास्थ्य स्वयंसेविका, समुदाय, वडा र पालिकाको ऐक्यबद्धताले मात्र यो सम्भव भएको बताउँदै बाल बच्चाको मृत्युदर घटाउनमा खोप अभियान सहज हुने बताउनुभयो। पूर्ण खोप सुनिश्चितता गर्नमा सहयोग गर्ने सम्पूर्णमा धन्यवाद ज्ञापन गर्नभयो।कार्यक्रममा जिल्ला समन्वय समिति उपसभापति रामकुमारी राना,बेलौरी नगरपालिकाका निमित्त प्रमुख प्रशासकिय अधिकृत झपिराज ओझा,नेपाल पत्रकार महासंघ कञ्चनपुर शाखा अध्यक्ष सुरेश सिंह धामी, स्वास्थ्य कार्यालय कञ्चनपुरका खोप फोकल पर्सन जनकबहादुर कुँवर, स्थानीय जनप्रतिनिधिहरू, कर्मचारीहरू, स्वास्थ्यकर्मी तथा महिला स्वास्थ्य स्वयंसेविका लगायतको उपस्थिति रहेको थियो।

कार्यक्रममा खोप अभियानमा योगदान पुर्याएका बापत उच्च मूल्यांकन गर्दै लक्ष्मीपुर स्वास्थ्य चौकीमा कार्यरत भारुदेवि बोहरा र निर्मला चौधरीलाई नगद रु दुई हजार पाँच सय रुपैयाँ सहित प्रमाणपत्र पत्र प्रदान गरीएको छ। नगरस्तरीय महिला स्वास्थ्य स्वयंसेविका समितिले उत्साहजनक भूमिका निर्वाह गरेवापत कदर प्रदान गरिएको बेलौरी नगरपालिका स्वास्थ्य शाखामा प्रमुख जयसिंह बोहराले जानकारी दिनुभयो।पालिकामा १२ वटा स्वास्थ्य संस्था रहेको छ।

पालिकाले आर्थिक वर्ष २०८१/०८२ मा २ हजार १सय ५७ जनालाई खोप सेवा प्रदान गरेको छ। कार्यक्रमको सहजीकरण रामपुर स्वास्थ्य चौकीका प्रमुख धर्मानन्द भट्टले गर्नुभएको थियो।