कञ्चनपुरको अरनिको स्कूलमा प्रेरणादायी मोटिभेसनल कार्यक्रम सम्पन्न

कञ्चनपुर । वेदकोट नगरपालिका–३, भम्कामा अवस्थित श्री अरनिको इंग्लिस सेकेन्डरी स्कूलले विद्यार्थीहरूको व्यक्तिगत र शैक्षिक विकासका लागि एक भव्य मोटिभेसनल कार्यक्रम सम्पन्न गरेको छ। कार्यक्रममा विद्यालयका २०० जना विद्यार्थीहरूले उत्साहपूर्ण सहभागिता जनाएका थिए।

कार्यक्रममा चर्चित मोटिभेटर क्षेत्र प्रसाद ग्यावलीले विद्यार्थीहरूलाई प्रेरित गर्नुभयो। ग्यावलीले आफ्नो प्रभावशाली प्रस्तुतिमा जीवनमा लक्ष्य निर्धारण, आत्मविश्वास, समय व्यवस्थापन र मेहनतको महत्त्वबारे गहकिलो छलफल समेत गर्नुभएको विद्यालयले जनाएको छ।उहाँले विद्यार्थीहरूलाई आफ्ना सपनाहरूलाई साकार बनाउन र चुनौतीहरूलाई अवसरमा बदल्न प्रेरित समेत गर्नुभएको थियो।

विद्यालयका प्रधानाध्यापक वासुदेव रोश्याराले कार्यक्रमको उद्देश्यबारे प्रकाश पार्दै यस्ता गतिविधिहरूले विद्यार्थीहरूमा सकारात्मक सोच र आत्मविश्वास बढाउन महत्त्वपूर्ण योगदान पुर्‍याउने बताउनुभयो।उहाँले भन्नुभयो “हाम्रा विद्यार्थीहरू भोलिका कर्णधार हुन्। यस्ता कार्यक्रमले उनीहरूलाई आफ्नो क्षमता पहिचान गर्न र जीवनमा अगाडि बढ्न प्रेरणा दिन्छ।”

यस्तै, विद्यालयका प्रबन्ध निर्देशक देवराज जोशीले यो कार्यक्रमले विद्यार्थीहरूको शैक्षिक यात्रामा मात्र नभई उनीहरूको व्यक्तिगत जीवनमा समेत दीर्घकालीन प्रभाव पार्ने विश्वास व्यक्त गर्नुभयो।उहाँले भन्नुभयो “हामीले विद्यार्थीहरूलाई किताबी ज्ञानसँगै जीवन कौशल पनि सिकाउनुपर्छ। यस्ता प्रेरणादायी कार्यक्रमहरू त्यसैको हिस्सा हुन्।”

कार्यक्रममा सहभागी विद्यार्थीहरूले मोटिभेटर ग्यावलीको प्रस्तुतिबाट आफूहरूमा नयाँ जोश र जाँगर थपिएको बताए।

विद्यालयले यस्ता रचनात्मक र प्रेरणादायी कार्यक्रमहरूलाई निरन्तरता दिने योजना बनाएको छ। प्रधानाध्यापक रोश्याराले आगामी दिनमा यस्ता थप कार्यक्रमहरू आयोजना गरी विद्यार्थीहरूको सर्वांगीण विकासमा योगदान पुर्‍याउने प्रतिबद्धता व्यक्त गर्नुभएको छ।

श्री अरनिको इंग्लिस सेकेन्डरी स्कूलले शैक्षिक गुणस्तरसँगै विद्यार्थीहरूको मानसिक र भावनात्मक विकासमा पनि जोड दिँदै आएको छ।