कञ्चनपुर । कञ्चनपुरको वेदकोट नगरपालिकामा स्थानीय बासिन्दालाई विद्युतीय चुलो, कढाई र कुकर वितरण गरिएको छ। वेदकोट उपभोक्ता समितिको आयोजना, पालिका र हिमाली प्रकृति कनेक्ट परियोजनाको आर्थिक सहयोग तथा साडा नेपालको सहकार्यमा मध्यवर्ती क्षेत्रका २ सय जनालाई यी सामग्री वितरण गरिएको हो।
सामग्री वितरण कार्यक्रमको सभाध्यक्षता वेदकोट उपभोक्ता समितिकी अध्यक्ष भानमती खडायतले गर्नुभएको थियो। कार्यक्रमका प्रमुख अतिथि नगर प्रमुख भोजराज बोहरा र विशिष्ट अतिथि उपप्रमुख तुलसी जोशी रहनुभएको थियो।
यसैगरी, शुक्लाफाँटा राष्ट्रिय निकुञ्ज व्यवस्थापन समितिका अध्यक्ष लब विष्ट, वेदकोट नगरपालिका वडा नम्बर १ र १० का वडा अध्यक्षहरू, कनेक्ट परियोजनाका टिम प्रमुख, शुक्लाफाँटा राष्ट्रिय निकुञ्जका सहायक संरक्षण अधिकृत, जेडएसएल नेपालका शुक्लाफाँटा प्रमुख, एनटिएनसीका प्रतिनिधिहरू, वडा सदस्यहरू र उपभोक्ताहरूको उपस्थिति रहेको थियो। कार्यक्रमको सञ्चालन वेदकोट उपभोक्ता समितिका सचिव पदमराज पाण्डेयले गर्नुभएको थियो।
कार्यक्रमलाई सम्बोधन गर्दै नगर प्रमुख भोजराज बोहराले जनतालाई आवश्यक पर्ने यस्ता कार्यक्रमलाई निरन्तरता दिइने बताउनुभयो। मानव र वन्यजन्तुबीचको द्वन्द्व बढ्दै गइरहेको परिवेशमा जंगली जनावरबाट हुने क्षति कम गर्न वैकल्पिक खेतीतर्फ आकर्षित हुन आवश्यक रहेको उहाँले बताउनुभयो। यसका लागि अदुवा-बेसार जातको खेती प्रवर्द्धन गर्ने र त्यसको बजारीकरण व्यवस्थापनको जिम्मा पालिकाले लिने प्रतिबद्धता उहाँले व्यक्त गर्नुभयो।
बोहराले विगतमा स्थानीय बासिन्दाको दाउरा र घाँसका लागि जंगलमा निर्भरता रहने गरेको स्मरण गर्दै अहिले सरकारले जंगललाई आफ्नो क्षेत्र घोषणा गरेपछि बस्तीलाई समस्या भएको बताउनुभयो। उहाँले द्वन्द्व कम गर्न बस्तीमै घाँस-स्याउला दिने रूख रोप्ने र दाउराको विकल्प बस्तीमै दिन सके मानव र वन्यजन्तुबीचको द्वन्द्व घट्ने भएकाले विद्युतीय चुलो वितरण गरिएको स्पष्ट पार्नुभयो।
विशिष्ट अतिथि उपप्रमुख तुलसी जोशीले आफूले पनि विगतमा जंगल गएर घाँस-दाउरा ल्याएको स्मरण गर्दै अहिले जंगल जाने दिन कम भएको र महिलाहरूले त्यो समयमा बढी जंगलमा नै काम गर्नुपर्ने अवस्था रहेको बताउनुभयो। तर, अब विद्युतीय चुलोले दाउराको प्रयोगमा कमी ल्याई स्वस्थ जीवन जिउन मद्दत पुग्ने उहाँले बताउनुभयो। दाउरा र ग्यासले मानवीय स्वास्थ्यमा प्रत्यक्ष असर गर्ने र सबैभन्दा बढी महिलाहरूले भान्सामा धेरै समय बिताउने भएकाले उनीहरू बढी जोखिममा रहने हुँदा यो विद्युतीय चुलो जोखिम कम गर्न वितरण गरिएको जोशीले उल्लेख गर्नुभयो।
वेदकोट नगरपालिका-१० की माया शार्कीले अब दाउराको भर नपरी विद्युतीय चुलोको प्रयोग गर्ने बताउनुभयो। जंगल गएर दाउरा ल्याउनुपर्ने र ग्यास खरिद गर्न आर्थिक अभाव रहने गरेकोमा अब विद्युतीय चुलोमा खाना बनाएर खुसीका साथ बस्ने उहाँले बताउनुभयो। शार्कीले सहयोगी दाता र पालिकालाई धन्यवाद समेत व्यक्त गर्नुभयो।
Discussion about this post