कञ्चनपुर । कञ्चनपुरको वेदकोट नगरपालिका वडा नम्बर–७ बसन्तपुर टोलमा विकासको नयाँ लहर चलेको छ। लामो समयदेखि आधारभूत पूर्वाधारको अभावमा रहेको यो टोलमा सडक, नाली, स्कुललगायतका विकास निर्माणले गति लिएपछि स्थानीयवासीले जनप्रतिनिधिहरूलाई सम्मान गरेका छन्। यो उपलब्धिले जनप्रतिनिधिप्रतिको विश्वासलाई थप बलियो बनाएको छ।
२०७९ को स्थानीय निर्वाचनमा निर्वाचित वडा अध्यक्ष थानेश्वर प्रसाद भट्ट र कार्यपालिका सदस्य पवन नेपालीको नेतृत्वमा बसन्तपुर टोलमा उल्लेखनीय विकास भएको छ। विशेष गरी, बसन्तपुरदेखि वडा नम्बर–९ सम्म जोड्ने सडक कालोपत्रे कार्य समयमै सम्पन्न भएकोमा स्थानीयवासीले खुसी व्यक्त गरेका छन्। यो सडकले स्थानीयको दैनिक जीवनलाई सहज बनाउनुका साथै व्यापार, यातायात र सामाजिक गतिविधिलाई समेत सहयोग पुर्याएको छ।
स्थानीयवासीले यो विकासमा सहयोग पुर्याउने सबैलाई धन्यवाद र आभार व्यक्त गरेका छन्। सङ्घीय सांसद एनपी साउद, प्रदेश सांसद बहादुर सिंह थापा, नगरप्रमुख भोजराज बोहरा, उपप्रमुखसहित वेदकोट नगर कार्यपालिका र वडा समितिको योगदानलाई विशेष रूपमा स्मरण गरिएको छ। यी जनप्रतिनिधिहरूको समन्वय र सक्रियताले बसन्तपुर टोलमा विकासको नयाँ आयाम थपिएको स्थानीयको भनाइ छ।
वडा अध्यक्ष थानेश्वर प्रसाद भट्टले यो सफलता सामूहिक प्रयासको परिणाम भएको बताए। उनले भने, “हाम्रो टिमले स्थानीयको चाहना र आवश्यकतालाई पहिलो प्राथमिकतामा राखेर काम गरेको छ। यो कालोपत्रे सडक हाम्रो प्रतिबद्धताको पहिलो कदम हो। आगामी दिनमा पनि शिक्षा, स्वास्थ्य र अन्य पूर्वाधारमा थप सुधार गर्नेछौँ।”
यस्तै, कार्यपालिका सदस्य पवन नेपालीले स्थानीयको सहभागिता र एकताले यो परियोजनालाई सफल बनाएको बताए। उनले थपे, “हामीलाई स्थानीयको साथ र विश्वासले यो काम सम्भव भएको हो। यो सम्मानले हामीलाई थप जिम्मेवारी बोध गराएको छ।”
सडक कालोपत्रे कार्यको जिम्मेवारी लिएको जय माता डागेश्वरी बिल्डर्सका सञ्चालक भोजराज ठगुन्नालाई पनि विशेष सम्मान गरिएको छ। उनले समयमै गुणस्तरीय काम सम्पन्न गरेर स्थानीयको मन जितेका छन्। ठगुन्नाले भने, “हामीले स्थानीयको आवश्यकता र अपेक्षालाई ध्यानमा राखेर काम गरेका हौँ। यो सम्मानले हामीलाई अझ राम्रो काम गर्न प्रेरणा मिलेको छ।”
त्यसैगरी टोलका अगुवा टिकाराम भट्टले यो विकासले बसन्तपुर टोलको मुहार फेरिएको बताए। उनले भने, “हिजोसम्म हामीसँग राम्रो सडक थिएन, तर आज कालोपत्रे सडकले हाम्रो टोललाई नयाँ पहिचान दिएको छ। यो सबै जनप्रतिनिधि र स्थानीयको एकताको परिणाम हो।” उनले यो सडकले स्थानीय उत्पादनलाई बजारसम्म पुर्याउन र बालबालिकाको शिक्षामा समेत सकारात्मक प्रभाव पार्ने विश्वास व्यक्त गरे।
यो कालोपत्रे सडकले बसन्तपुर टोललाई वेदकोट नगरपालिकाको अन्य क्षेत्रसँग जोड्नुका साथै आर्थिक र सामाजिक विकासमा महत्त्वपूर्ण योगदान पुर्याउने अपेक्षा गरिएको छ। स्थानीयवासीले आगामी दिनमा पनि यस्तै विकास कार्यको निरन्तरताको अपेक्षा गरेका छन्।
Discussion about this post