महेन्द्रनगर । बेदकोट नगरपालिकामा १५ शैय्याको नगर अस्पताल निर्माण कार्य सुरु भएको छ । बेदकोट नगरपालिका ३ मा अस्पताल बनाउन झण्डै दुई वर्ष अघि ९ करोड ७४ लाखमा ठेक्का सम्झौता भएको थियो ।
ठेक्का सम्झौता भएर निर्माण कार्य सुरु नभएपछि केही दिन अघि स्थानीयले आन्दोलन गरी दबाव दिएका थिए । निर्माण कम्पनीले साइड क्लियर नभएको कारण देखाउँदै निर्माण कार्य अघि बढाउन ढिलाई गरेको थियो ।
बेदकोट नगरपालिकाका मेयर भोजराज बोहराले ठेक्का सम्झौता अनुसार नगर अस्पताल निर्माण कार्य सुरु गरिएको बताए । ‘ देशभरका एकै पटक शिलान्यास गरिएका अस्पतालमध्ये यो अस्पताल पनि हो, ठेक्का सम्झौता भएर पनि निर्माण कार्य सुरु भएको थिएन,’ मेयर बोहराले भने,‘अहिले निर्माण कार्य अघि बढेको छ, निर्माण कम्पनीले यसलाई तीव्रता दिनेमा विश्वास लिएको छु ।’
बेदकोटमा मेयर बोहरा आउन अघि नै अघिल्लो कार्यकालमा राजेन्द्र निर्माण सेवासित अस्पताल बनाउन ठेक्का सम्झौता गरिएका थियो । ठेक्का सम्झौतापछि निर्माण कम्पनीले ८५ लाख पेश्की रकम लिएको थियो । नगरपालिकाले निर्माण सुरु गर्न पटक पटक आग्रह गर्दा पनि निर्माण कम्पनी साइड क्लियर नभएको कारण देखाउँदै आएको थियो ।
मेयर बोहरा बेदकोटको नेतृत्व सम्हालेपछि पनि निर्माण कम्पनीलाई भेटेर ठेक्का सम्झौता अनुसार अस्पताल निर्माण कार्य अघि बढाउन आग्रह गर्दै आएका थिए । उनी आएपछि अस्पतालका लागि चाहिने आवश्यक जग्गा व्यवस्थापन सहितका कार्य गरी साइड क्लियर गरिएको थियो ।
‘अस्पताल शिलान्यास गरियो, ठेक्का सम्झौता पनि भयो , तर त्यसका लागि चाहिने जग्गाको व्यवस्थापन गरिएको थिएन्,’ मेयर बोहराले भने,‘मैले नगरको नेतृत्व लिएपछि निर्माण व्यवसायीलाई फ्लोअप गरे, कार्तिक मंसिरमा निर्वाचन आचार सँहिताका कारण काम हुन सकेन, त्यसपछि अनि जग्गा लगायतका आवश्यक व्यवस्थापनका कार्य गरी साइड क्लियर गरियो, नत्र निर्माण कम्पनीले साइड क्लियरलाई कारण देखाउँदै काम गर्न नसक्ने अवस्था देखाउँदै आएको थियो ।’
बेदकोटस्थित शारदा माध्यमिक विद्यालयले नगर अस्पताल बनाउन सात कट्टा जग्गा उपलब्ध गराएको थियो । अस्पतालका लागि १२ कट्टा जग्गा चाहिएको थियो । अपुग पाँच कट्टा जग्गा सामुदायिक वनबाट उपलब्ध भएपछि अहिले अस्पताल निर्माण सुरु गरिएको छ ।
१२ कट्टा जग्गामध्ये ९ कट्टा जग्गामा अस्पतालका लागि दुई ओटा भवन निर्माण हुने छन् । त्यस बाहेक चिकित्सक, स्वास्थ्यकर्मी, कर्मचारी लगायतका आवाश लगायतका भवन निर्माण गर्ने योजना बनाइएको छ ।
नगर अस्पताल बनेपछि बेदकोट र छिमेकी शुक्लाफाँटा नगरपालिकाका वासिन्दालाई समेत विशेषज्ञ चिकित्सबाट स्वास्थ्य सेवा लिन सहज हुने मेयर बोहराले बताए । ‘यो अस्पताल बनेपछि बेदकोटका वासिन्दाले सहज रुपमा सेवा सुविधा पाउने कुरा छँदैछ,’ उनले भने,‘त्यस बाहेक छिमेकी शुक्लाफाँटाका वासिन्दा पनि सेवा लिन सक्छन् ।’
बेदकोटमा अहिले सुडा र दैजीमा स्वास्थ्य चौकी सञ्चालना छन् । यी दुबैमा बर्थिङ्ग सेन्ट छन् । नगरपालिकाका सबै १० वडामा आधारभूत स्वास्थ्य सेवा केन्द्र सञ्चालन गरिएका छन् ।
अस्पताल बनेपछि बेदकोटका वासिन्दाले आफ्नै पालिकामा विशेषज्ञ स्वास्थ्य सेवा पाउने भएका छन् । अहिले स्थानीयले महाकाली प्रादेशिक अस्पताल वा जिल्ला बाहिर गएर विशेषज्ञ स्वास्थ्य सेवा लिँदै आएका छन् ।
मेयर बोहराले धर्मपुरमा पनि बर्थिङ्ग सेन्टर सञ्चालनका लागि सबै तयारी गरिएको बताए । ‘अहिले त्यहाँ बर्थिङ्ग सेन्टरका लागि उपकरण सहितका सबै तयारी गरिएको छ, छिटो नै सञ्चालन गर्छौ’ उनले भने ।
बेदकोट नगरपालिकाका प्रमुख प्रशासकीय अधिकृत पदमराज भट्टले १३ करोड ४५ लाखमा ठेक्का आव्हान गरिएकोमा घटाघटीमा ९ करोड ७४ लाखमा सम्झौता भएको बताए । नगरपालिकाले २०७७ माघमा ठेक्का आव्हान गरेको थियो । २०७८ बैशाखमा दुई वर्षमा निर्माण कार्य सक्ने गरी निर्माण कम्पनीसित ठेक्का सम्झौता गरिएको थियो ।
निर्माण कम्पनीका साइड इन्चार्ज राम बहादुर बुढाले साइड क्लियर नभएका कारण निर्माण कार्य ढिलो सुरु हुन पुगेको बताए । ‘ठेक्का सम्झौतापछि काम सुरु गर्न खोजेका थियौ, जमिनको समस्या थियो, त्यसपछि रुखको पनि समस्या देखियो,’ उनले भने,‘साइड नै क्लियर नभएपछि काम सुरु हुन सकेन, अरु कारणले होइन ।’
अस्पताल निर्माण कार्य सुरु नभएपछि स्थानीय खगेन्द्र नाथको नेतृत्वमा संघर्ष समिति गठन गरी दबाव दिइएको थियो । समितिले चरणबद्ध आन्दोलनका कार्यक्रम घोषणा गरी नगरपालिकामा धर्ना दिएको थियो ।
संघर्ष समितिका संयोजक नाथले ठेक्का सम्झौता अनुसार अस्पताल निर्माण कार्य हुनु पर्ने माग समितिले राख्दै आएको बताए ।
‘सम्झौता भएपछि निर्माण कार्य सुरु हुन सकेको थिएन, त्यसका लागि दबाव दिन समिति बनाएर आन्दोलन पनि ग¥यौ’ उनले भने,‘अहिले निर्माण सुरु भएको छ, यसका लागि मेयर साप लगायतलाई धन्यवाद दिन चाहन्छौ, र यो अस्पताल सम्झौता अनुसार निर्माण कार्य भएर सञ्चालनमा आओस भन्ने चाहन्छौ ।’
Discussion about this post