महेन्द्रनगर । कञ्चनपुरको वेदकोट नगरपालिका–८ स्थित श्री बैजनाथ माध्यमिक विद्यालय गैलनदीमा २० दिने स्काउट, लागूऔषध दुव्र्यसन तथा विपद् व्यवस्थापन सम्बन्धी तालिमको उद्घाटन गरिएको छ । प्रदेश स्काउटको आयोजना तथा वेदकोट नगरपालिका–८ को सहयोगमा सञ्चालन भएको तालिमको उद्घाटन कार्यक्रम स्काउट प्रदेश आयुक्त तोयराज जोशी को अध्यक्षतामा सम्पन्न भएको हो ।
कार्यक्रममा वडा अध्यक्ष महेश राज जोशी प्रमुख अतिथिका रुपमा सहभागी रहेका थिए । कार्यक्रममा बोल्दै प्रमुख अतिथि जोशीले युवापुस्तालाई अनुशासित, जिम्मेवार र सामाजिक उत्तरदायी बनाउन स्काउट तालिम प्रभावकारी हुने बताए ।
उनले लागूऔषध दुव्र्यसन न्यूनीकरण तथा विपद्का समयमा समुदायमा सहयोग गर्न सक्षम जनशक्ति तयार पार्न यस्ता तालिम आवश्यक रहेको उल्लेख गरे ।
अध्यक्षता गरिरहेका प्रदेश आयुक्त तोयराज जोशीले स्काउटले युवामा नेतृत्व विकास, सेवा भावना र अनुशासनको विकास गराउने बताउँदै तालिमबाट सहभागी विद्यार्थी तथा युवाले व्यवहारिक ज्ञान हासिल गर्ने विश्वास व्यक्त गरे ।
२० दिनसम्म सञ्चालन हुने तालिममा स्काउट सम्बन्धी आधारभूत ज्ञान, लागूऔषध दुव्र्यसनबाट बच्ने उपाय, विपद् व्यवस्थापन, उद्धार तथा जनचेतनामूलक विषयमा प्रशिक्षण प्रदान गरिने आयोजकले जनाएको छ ।
कार्यक्रमको सञ्चालन राजेन्द्र प्रसाद भट्ट ले गरेका थिए ।
Discussion about this post