विश्वकप २०२६ : नेयमार दोस्रो खेलबाट पनि बाहिर

ब्राजिलका स्टार फरवार्ड नेयमार ले फिफा विश्वकप २०२६ को समूह चरणअन्तर्गत दोस्रो खेल पनि गुमाउने भएका छन्। पिँडुलाको चोट पूर्णरूपमा निको नभएकाले उनले हैटीविरुद्धको खेल खेल्न नसक्ने ब्राजिलियन फुटबल महासङ्घ (सीबीएफ) ले जनाएको छ।

ब्राजिलका लागि सबैभन्दा धेरै ७९ अन्तर्राष्ट्रिय गोल गरेका ३४ वर्षीय नेयमार गएको मे ७ मा सान्तोस एफसीबाट खेल्ने क्रममा घाइते भएका थिए। चौथो पटक विश्वकप खेलिरहेका उनी हाल सामान्य शारीरिक अभ्यासमा फर्किए पनि पूर्ण प्रशिक्षणमा सहभागी हुन सकेका छैनन्।

समूह ‘सी’ मा रहेको पाँच पटकको विश्व विजेता ब्राजिलले भोलि बिहान हैटीसँग खेल्दैछ। खेल अमेरिकाको फिलाडेल्फियास्थित रंगशालामा हुनेछ।

ब्राजिलले आफ्नो पहिलो खेलमा मोरक्कोसँग १–१ गोलको बराबरी खेलेको थियो। नेयमारको अनुपस्थितिले टोलीको आक्रमणमा प्रभाव पर्ने अनुमान गरिएको छ।