कञ्चनपुर । कञ्चनपुरको भीमदत्त नगरपालिका वडा नम्बर ११ ले वडा भित्रका ३२ जना विपन्न, दलित तथा जेहेन्दार बालबालिकाहरूलाई आर्थिक सहयोग पुर्याउने उद्देश्यका साथ छात्रवृत्ति रकम प्रदान गरेको छ। वडा कार्यालयले चालू आर्थिक वर्षको स्वीकृत “विद्यार्थी छात्रवृत्ति कार्यक्रम” अन्तर्गत विद्यालय तहदेखि उच्च शिक्षासम्म अध्ययनरत विद्यार्थीहरूलाई उक्त छात्रवृत्ति वितरण गरेको हो।
वडा अध्यक्ष प्रकाश थापाले आर्थिक अभावका कारण कोही पनि बालबालिका शिक्षाबाट बञ्चित हुन नपरोस् भन्ने उद्देश्यले वडा भित्रका आर्थिक रूपमा विपन्न, दलित र जेहेन्दार विद्यार्थीहरूलाई प्रोत्साहन स्वरूप छात्रवृत्ति रकम प्रदान गरिएको बताउनुभयो। उहाँले यस आर्थिक सहयोगले बालबालिकाको पढाइ र शैक्षिक सामग्री खरिदमा थोरै भए पनि राहत पुग्ने विश्वास व्यक्त गर्नुभयो।
छात्रवृत्ति पाएपछि स्थानीय अभिभावक र विद्यार्थीहरू निकै खुसी भएका छन्। स्थानीय अभिभावक सरस्वती दमाईले आफ्नी छोरीले पनि वडाबाट छात्रवृत्ति पाएको बताउँदै खुसी व्यक्त गर्नुभयो। उहाँले गरिब र विपन्न परिवारका लागि आर्थिक सहयोग पाउनु ठूलो राहत भएको भन्दै वडा कार्यालयलाई धन्यवाद दिनुभयो।
त्यस्तै, छात्रवृत्ति प्राप्त गरेकी कक्षा १० मा अध्ययनरत छात्रा आकृति उपाध्यायले वडाले आफूहरू जस्ता जेहेन्दार विद्यार्थीलाई गरेको यो मूल्याङ्कनले आगामी दिनमा अझ मेहनतका साथ पढ्ने हौसला मिलेको बताउनुभयो। यसै गरी, लिटिल बुद्ध एकेडेमी (एलबीए) मा प्लस टु (+2) तहमा अध्ययनरत छात्र मुकेश नाथले उच्च शिक्षा पढिरहेका बेला वडाबाट प्राप्त भएको यो छात्रवृत्ति रकमले आफ्नो शैक्षिक खर्च धान्न धेरै ठूलो मद्दत पुगेको बताउनुभयो।
भीमदत्त नगरपालिका वडा नम्बर ११ का वडा अध्यक्ष थापा स्थानीय तहको निर्वाचनबाट निर्वाचित भएदेखि नै वडाको शैक्षिक गुणस्तर सुधारका लागि निरन्तर विभिन्न कार्यक्रमहरू गर्दै आउनुभएको छ। वडा कार्यालयले यसअघि वडाका विद्यार्थीहरूका लागि निःशुल्क कम्प्युटर कक्षा, माध्यमिक शिक्षा परीक्षा (एसईई) दिने विद्यार्थीहरूका लागि निःशुल्क तयारी कक्षा लगायतका धेरै कार्यक्रमहरू सञ्चालन गरिसकेको छ।
वडा कार्यालयले कुल १ लाख ४० हजार रुपैयाँ बराबरको छात्रवृत्ति रकम प्रदान गरेको हो। वडा अध्यक्ष थापाले शिक्षा क्षेत्रको विकास र सुधार नै वडाको समृद्धिको मुख्य आधार भएको बताउँदै आगामी दिनहरूमा पनि विपन्न र लक्षित वर्गका विद्यार्थीहरूलाई लक्षित गरी यस्ता कार्यक्रमहरूलाई थप प्रभावकारी रूपमा निरन्तरता दिने प्रतिबद्धता व्यक्त गर्नुभयो।
Discussion about this post