मैले भनेकै थिएँ ….
मैले भनेकै थिएँ
कसैको नभए सम्म म तिम्रो नै हुनेछु
मलाई अहिले पनि राम्ररी सम्झना छ
मैले पकाएकै थिएँ
अलिकति काँचो प्रेम
खाएकै थिएँ एक मिठो भरोसा
धोएकै थिएँ एक जुठो दुःख
र सुकाएकै थिएँ एक बाटा विगत
मलाई अहिले पनि राम्ररी सम्झना छ
मिलेकै थियो बेला बेला
हामी बिच छुट्टिने बहाना
कहिले म तिमीलाई सम्झिएर बिग्रिन्थे
कहिले म बिग्रिएर तिमीलाई सम्झिन्थे
बिग्रिनु र सम्झिनु बिच
मेरो एकोहोरो सम्बन्ध थियो
नियतिको आकाशवाणी उहिल्यै सुनिएको हो
सिफारिस
मैले भनेकै थिएँ
कसैको नभए सम्म म तिम्रो नै हुनेछु
आज म अकस्मात!
गहिरो प्रेममा परेको छु
आफैँ सँग
यतिबेला
मलाई पटक्कै मन परेको छैन
अरू कसैले मेरो मलाई मन पराएको
अरू कसैले मेरो मनलाई मन पराएको
म आज घटाइरहेछु रफ्तारमा
हिजो म सँग बिस्तारै जोडिएका नामहरू
मलाई अब केवल प्रेम गर्नु छ
मैले वर्षौँ देखि धोका दिँदै आएको
मेरो एकमात्र साक्षीलाई
मेरो एकमात्र साथीलाई
मैले भनेकै थिएँ
म कसैको नभए सम्म तिम्रो नै हुनेछु।
【 आकाशवाणी 】
प्रचण्ड भाष्कर
