नाफा नोक्सानको हिसाब गर्ने बानी भएन
सोचिन्छ, यस्तै हो आफूसँग लगानी भएन
संघर्ष गरियो, गर्दैछु, निरन्तर गर्नुपर्ने होला
लाभ भएन, खुसी छु, कुनै नोक्सानी भएन
कहाँ अल्झियो थाहा छैन तर अल्झेको छ
मैले बुझ्ने गरी लेखिएन कुनै कहानी भएन
कर्मशील मान्छे हूँ स्वाभिमान बेचेर बस्दिन
मलाई त्यति मतलब हुँदैन, आम्दानी भएन
कसैले आदर्श मान्ने छन्, मलाई विश्वास छ
कतिलाई चिन्ता होला, किन खरानी भएन
मेहनत गरेको खेती फलेन, कोहिबात छैन
यस्तै हो, कतै मल भएन, कतै पानी भएन
