१-बालपनकी हाँसि ठट्टा, दैला आउँछे घुमि,
जैबेला कर्मकी सोच्चौ, सकिन्न मन थुमि ।।
२-चिन्ता छैन झर्को छैन, खाई खेलि फेरिया,
काँ गयाहै बालका बेला, कि दीन हेरिया ।।
३-जिन्दगी सोच्याको जसो, क्यान हुन्या रैछ,
मुईत भन्थिउँ दिन् जनान, जोबन जन्यारैछ ।।
४-समयरे जिन्दगिका खुट्का हुन्यार्यान,
बाल्पनहै बाला जोबन, सङ्ङ पुग्यार्यान।।
५-हाँस्सु खेल्लु जिन्दगिमा, भण्णाईकी सजिछ,
सोच्याझो नहुन्या कैलै, तत्ति असजि छ।।
६-बालो जोबन बालि बैस, झाईलागी खाईलागी,
हासुँ खेलुँ भण्ण्या बेला, बिपत्ति आईलागी ।।
७-न आईझा कोयाली चड़ि, मेरा बस्न्या देश,
मन चोद्द्या मगज चोद्या, मराजालका भेष ।।
८-उदासि मन बहुराउन्या, बयालीका रेष,
ज्युज्यान सुकेर बाइग्यो, रित्तो परान सेस ।।
९-उड्डोईरेइ कालिका कौवा, बयाली खेल्लोईरेई,
काँइ दुखका सौत्या मिल्या, झल्कना रेल्लोईरेइ ।।
१०-न धेका दन्तकी पाटि, नाई थि हाँस्न्या बाटो,
रुना रुना धोयीगैला, सिरानीको कातो ।।
११-कठैला जुनेली रात, मुखि अनेसैछ,
आउँसुकी सागर पौडि, जिवन् चल्याकैछ ।।
१२-सोचन्थ्या हाँसेर जिवन, काटेर बाइझौला,
कालकी मुठिका मान्स, दुईदिन खाइझौला ।।
१३-नहुन्या रैछला दैव, मनका सोच्या जसो,
तेरै हिस्सा चल्न्या रैछ, प्रकृतिको नसो ।।
१४-नसोच्नु मनुष्य चोला, हाँशि हाँशि रौला,
हुनैन मनका जसो, बिपत्तिका बौला ।।
रचना : रमेश भण्डारी (आँसु)
मेलौली नगरपालीका ०४ तीताबै बामूनी, बैतडी
