कञ्चनपुर – भीमदत्त नगरपालिका वडा नम्बर १३ मा ऐलानी जग्गा नाप जाँचको कार्य मङ्गलवार देखी सुरु भएको छ। वडाध्यक्ष राम बहादुर बोहरा (झक्कास)ले वडाको दक्षिणी भेग हात्तीसारबाट नाप जाँच सुरु गरिएको जानकारी दिए। यो कार्यले वर्षौँदेखि भूमिहीन, सुकुमबासी र अव्यवस्थित बसोबास गरिरहेका नागरिकलाई जमिनको मालिक बनाउने लक्ष्य राखिएको छ।
वडाध्यक्ष झक्कासले भने, “मेयर पदम बोगटीको निर्देशनअनुसार हामीले अव्यवस्थित बसोबासीको जमिन नाप जाँच सुरु गरेका छौँ। पहिलो चरणमा अव्यवस्थित बसोबासीको जमिन नाप्छौँ, त्यसपछि भूमिहीन दलित र सुकुमबासीका लागि जमिन खोज्ने छौँ।” उनले चुनावी प्रतिबद्धताअनुसार जनतालाई जमिनको स्वामित्व दिलाउने सङ्कल्प व्यक्त गरे। छुटेका व्यक्तिहरूलाई समावेश गर्न भूमि समस्या समाधान आयोगसँग छलफल गरिने उनले बताए।
वडा सचिव हर्क बहादुर धामीका अनुसार, यसअघि भूमिहीन दलिततर्फ १३, सुकुमबासीतर्फ ३ र अव्यवस्थित बसोबासीतर्फ ३१८ जनाले फारम भरेका छन्। नाप जाँच सुरु भएसँगै जग्गाधनी प्रमाणपत्र (लालपुर्जा) वितरणको प्रक्रिया आयोगमार्फत अघि बढ्ने उनले बताए।
भूमि समस्या समाधान आयोग कञ्चनपुरका अध्यक्ष नेत्र प्रकाश पन्तले वडा नम्बर १३ लाई भूमिसम्बन्धी समस्या समाधानमा अग्रसर हुन जोड दिए। आयोगका केन्द्रीय अध्यक्ष हरि प्रसाद रिजालले देशभर जमिन नाप जाँच र लालपुर्जा वितरणको काम तीव्र गतिमा अघि बढिरहेको बताए।
भीनपाका मेयर पदम बोगटीले नगरका सबै वडामा भूमिहीन सुकुमबासी, अव्यवस्थित बसोबासी र भूमिहीन दलितलाई जमिनको मालिक बनाउने प्रतिबद्धता दोहोर्याए। उनले सबै वडा र जिम्मेवार निकायलाई यसतर्फ गम्भीर भएर लाग्न निर्देशन दिएका छन्।
यसअघि कञ्चनपुरका दोधारा-चाँदनी, वेदकोट, शुक्लाफाँटा, कृष्णपुर र बेलौरीमा लालपुर्जा वितरण गरिएको थियो। हात्तीसारबाट सुरु भएको नाप जाँचले वडा १३ का भूमिहीन जनतामा जमिनको मालिक बन्ने आशा पलाएको छ।
Discussion about this post