काठमाडौं – पछिल्लो पुस्ताका युवाहरू आधुनिकता र विदेशी संस्कृतितर्फ आकर्षित भइरहेका बेला बैतडीका युवा अमृत नाथ भने आफ्नो मौलिक भाषा, संस्कृति, रीतिरिवाज र देउडा भाकाको संरक्षण तथा प्रवद्र्धनमा सक्रिय देखिएका छन्।
पढाइको सिलसिलामा हाल जापानमा रहेका नाथले विदेशमा पुगेपछि पनि आफ्नो स्थानीय भाषा, मौलिक संस्कृति र संगीतलाई निरन्तरता दिइरहेका छन्। नेपालदेखि हजारौँ किलोमिटर टाढा जापानमा रहेर पनि उनले आफ्नै स्थानीय भाषामा गीत तथा हास्य सामग्री निर्माण गर्दै आएका छन्।
स्थानीय भाषा विस्तारै प्रयोगबाट हराउँदै गएको र नयाँ पुस्ताका कतिपय युवाहरूले आफ्नै मातृभाषा बोल्नसमेत हिचकिचाउने अवस्था देखिएको भन्दै नाथले भने आफ्नो भाषालाई गर्वका साथ प्रयोग गर्ने अभियानलाई निरन्तरता दिएका छन्। उनी जुनसुकै ठाउँमा पुगे पनि आफ्नै स्थानीय भाषाबाट कुराकानी सुरु गर्न रुचाउँछन्।
नाथले स्थानीय भाषामा आधारित विभिन्न हास्य कार्यक्रमका भिडियोसमेत सार्वजनिक गरिसकेका छन्।
Discussion about this post