कञ्चनपुर – सुदूरपश्चिम प्रदेशको शिक्षा क्षेत्रका सम्मानित व्यक्तित्व तथा राष्ट्रिय कलेज सुख्खड, कैलालीका पूर्व क्याम्पस प्रमुख प्राध्यापक कर्ण बहादुर भण्डारीको उपचारको क्रममा शुक्रबार दिउँसो अस्पतालमा निधन भएको छ। वेदकोट नगरपालिका वडा नम्बर -२, बसन्तथला स्थायी घर भएका भण्डारीको निधनको खबरले शैक्षिक र सामाजिक क्षेत्रमा शोकको छाया फैलिएको छ।
नेपाल राष्ट्रिय शिक्षक संगठनका पूर्व जिल्ला अध्यक्ष, केन्द्रीय सदस्य, नेपाल शिक्षक महासंघका पूर्व केन्द्रीय सदस्य, प्रगतिशील प्राध्यापक संघका केन्द्रीय सदस्य, साबिक दैजी गाविसका नेकपा एमाले गाउँ कमिटी सल्लाहकार संयोजक (२०५८) र २०५४ सालमा शिक्षा राज्यमन्त्री भोजराज जोशीको स्वकीय सचिवको जिम्मेवारी निर्वाह गरेका भण्डारी एक प्रखर बौद्धिक व्यक्तित्वका रूपमा परिचित थिए।
वेदकोटका निवर्तमान नगरप्रमुख अशोक कुमार चन्दले भण्डारीको निधनले शिक्षा क्षेत्रमा अपूरणीय क्षति पुगेको बताए। “उहाँको योगदान सधैं स्मरणीय रहनेछ,” चन्दले भने।
जेठ ३ गते बिहान ७ बजेदेखि १० बजेसम्म भण्डारीको पार्थिव शरीरलाई राष्ट्रिय कलेज सुख्खडमा अन्तिम श्रद्धाञ्जलीका लागि राखिनेछ। त्यसपछि बिहान १० बजे सुख्खडबाट शवयात्रा सुरु भई कञ्चनपुर जिल्लाको महाकाली नदीको भुजेलाघाटमा दिउँसो १२ बजे दाहसंस्कार गरिनेछ।
भण्डारीको निधनप्रति विभिन्न संघसंस्था र शुभचिन्तकहरूले गहिरो समवेदना प्रकट गरेका छन्।
Discussion about this post