कञ्चनपुर – लैङ्गिक समानता, सामाजिक समावेशीकरण तथा मानव अधिकार प्रवर्द्धनसम्बन्धी तालिम वेदकोट नगरपालिकामा सुरु भएको छ। वेदकोट नगरपालिकाका प्रमुख भोजराज बोहराको प्रमुख आतिथ्यतामा आयोजित उक्त तालिमको सभापतित्व चुरे संरक्षण सञ्जाल कञ्चनपुरका अध्यक्ष रवीन्द्र कुँवरले गर्नुभएको थियो।
चुरे संरक्षण सञ्जाल कञ्चनपुरद्वारा आयोजित यो कार्यक्रममा निवर्तमान प्रमुख जिल्ला अधिकारी, विभिन्न सामुदायिक वनका पदाधिकारीहरूको बाक्लो उपस्थिति रहेको थियो। तराई भू–परिधि (TAL) कार्यक्रम, कोहलपुर, बाँकेको सहयोगमा सञ्चालित यो तालिम बुधवार सम्म चल्नेछ।
कार्यक्रममा बोल्दै वेदकोट नगरपालिकाका नगर प्रमुख भोजराज बोहराले लैङ्गिक समानता र सामाजिक समावेशीकरणले समाजमा सकारात्मक परिवर्तन ल्याउने बताउनुभयो। उहाँले यस्ता तालिमले स्थानीय स्तरमा मानव अधिकारको संरक्षण र प्रवर्द्धनमा महत्त्वपूर्ण योगदान पुर्याउने विश्वास व्यक्त गर्नुभयो।
त्यसैगरी, चुरे संरक्षण सञ्जाल कञ्चनपुरका अध्यक्ष रवीन्द्र कुँवरले कार्यक्रमको उद्देश्यबारे प्रकाश पार्दै सामाजिक विभेद अन्त्य र संरक्षणको क्षेत्रमा सबैको सहभागिता आवश्यक रहेको औँल्याउनुभयो। उहाँले चुरे क्षेत्रको संरक्षणसँगै मानव अधिकार र समावेशीकरणका मुद्दालाई जोडेर अगाडि बढ्ने प्रतिबद्धता व्यक्त गर्नुभयो।
तालिमले सहभागीहरूलाई लैङ्गिक समानता, सामाजिक न्याय र मानव अधिकारका विषयमा सचेत गराउने अपेक्षा गरिएको छ।
Discussion about this post