कञ्चनपुर – नेपालको अग्रणी इन्टरनेट सेवा प्रदायक कम्पनी वर्ल्ड लिङ्क कम्युनिकेसनको महेन्द्रनगर शाखाले SAK डिजिटल युनिभर्सिटी संस्थासँग एक महत्त्वपूर्ण सम्झौता (MOU) गरेको छ। यो सम्झौताले डिजिटल शिक्षा र इन्टरनेट सेवालाई जोडेर नयाँ अवसरहरू सिर्जना गर्ने लक्ष्य राखेको छ।
सम्झौता अनुसार, डिजिटल मार्केटिङ, SEO (सर्च इन्जिन अप्टिमाइजेसन), फ्रीलान्सिङ, वेब डिजाइनिङ लगायतका विषयहरूमा अनलाइन वा भौतिक कक्षाहरू मार्फत सिक्न इच्छुक व्यक्तिहरूले वर्ल्ड लिङ्कका ग्राहक भएमा SAK डिजिटल विश्वविद्यालयका विभिन्न पाठ्यक्रमहरूमा ८ देखि १८ प्रतिशतसम्म छुट प्राप्त गर्न सक्नेछन्। त्यस्तै, SAK डिजिटल विश्वविद्यालयका विद्यार्थीहरूले वर्ल्ड लिङ्कको इन्टरनेट सेवाको नयाँ जडान वा नवीकरण गर्दा ५ देखि १५ प्रतिशतसम्म छुट पाउनेछन्।
यो सहकार्यले डिजिटल सीप विकास गर्न चाहने युवाहरू र इन्टरनेट सेवाको पहुँच विस्तार गर्न खोज्ने कम्पनी दुवैलाई फाइदा पुग्ने विश्वास गरिएको छ।
वर्ल्ड लिङ्क महेन्द्रनगर शाखाका प्रमुख धनराज उपाध्यायले भने, “हामीले यो सम्झौतामार्फत डिजिटल शिक्षालाई प्रोत्साहन गर्नुका साथै हाम्रा ग्राहकहरूलाई थप सुविधा प्रदान गर्न खोजेका छौँ।”
त्यस्तै, SAK डिजिटल युनिभर्सिटीका प्रमुख गणेश दत्त जोशीले पनि यो सहकार्यले विद्यार्थीहरूलाई गुणस्तरीय इन्टरनेट सेवा र व्यावहारिक सीप सिक्ने अवसर दुवै प्रदान गर्ने बताए।
यो पहलले महेन्द्रनगर क्षेत्रमा डिजिटल साक्षरता र स्वरोजगारका अवसरहरू बढाउने अपेक्षा गरिएको छ।
Discussion about this post