कञ्चनपुर – कञ्चनपुरको वेदकोट नगरपालिका वडा नम्बर ९ मा ज्येष्ठ नागरिकहरूका लागि निःशुल्क स्वास्थ्य शिविर सम्पन्न भएको छ। वडा कार्यालय र वेदकोट नगरपालिका स्वास्थय शाखाको आयोजनामा तथा महाकाली प्रादेशिक अस्पतालको प्राविधिक सहयोगमा शिविर सञ्चालन गरिएको हो।
वेदकोट नगरपालिका ९ का वडा अध्यक्ष जनक बहादुर बिष्टले वडा कार्यालयले ज्येष्ठ नागरिकहरूलाई घरमै आएर स्वास्थ्य जाँच गराउने उद्देश्य राखेर एक लाख बजेट छुट्याइ शिविर सञ्चालन गरिएको बताए। वडामा रहेका ज्येष्ठ नागरिकहरूको स्वास्थ्य प्रति वडा कार्यालय संवेदनशिल रहको उनको भनाइ रहेको छ। उनले विगतमा पनि वडामा आँखा शिविर सञ्चालन गरिएको बताए । साथै शिविरबाट १५३ जना जेष्ठ नागरिकको स्वास्थ्य जाँच गरिएको उनले बताएका छन्।
त्यसैगरी वेदकोटका नगर प्रमुख भोजराज बोहराले ज्येष्ठ नागरिकहरूको स्वास्थ्यप्रति नगरपालिका संवेदनशिल रहेको बताए। उनले आँखा शिविरबाट ३ हजार पाँच सयको आँखा जाँच, ७ सय भन्दा बढीलाई चस्मा र ३ सय ५० भन्दा बढीको आँखाको शल्यक्रिया गर्ने कार्य वेदकोट नगरपालिकाले सम्पन्न गरिसकेको बताए। साथै नगर प्रमुख बोहराले स्वास्थ्य शिविरहरू सञ्चालन गर्न नगरपालिका तत्पर रहेको बताए।
महाकाली प्रादेशिक अस्पतालका व्यवस्थापन समिति अध्यक्ष कृष्ण भट्टले धेरै टाढा जान नसक्ने ज्येष्ठ नागरिकहरूका लागि यस्ता शिविरहरू प्रभावकारी रहने बताए। साथै उनले महाकाली प्रादेशिक अस्पताल यस्ता स्वास्थयमुखि कार्यक्रमहरूमा सहकार्य गर्न तयार रहेको बताएका छन्।
महाकाली प्रादेशिक अस्पतालका मे.सु अर्जुन भट्ट र एमबिबिएस धिरज जोशीले शिविरमा सहभागीहरूको स्वास्थ्य जाँच गरेका थिए। त्यसैगरी स्वास्थय जाँचबाट २ जना ज्येष्ठ नागरिकलाई हर्निया, २ जनालाई हाइड्रोसिल र २ जना ज्येष्ठ महिलालाई आङ खसेको समस्या पत्ता लागेको र उनीहरूको महाकाली प्रादेशिक अस्पतालमा निशुल्क उपचार गरिने छ भने सामान्य रोग देखिएका अन्यलाई निःशुल्क औषधि वितरण गरिएको छ।
Discussion about this post