सुदूरपश्चिम विश्वविद्यालयमा वर्ष दिनमै दुई दीक्षान्त, प्रधानमन्त्री आउने, १७९ विद्यार्थी दीक्षित हुँदै

महेन्द्रनगर । सुदूरपश्चिम विश्वविद्यालयको तेस्रो दीक्षान्त समारोह आउँदो आइतबार हुने भएको छ । असारमा दोस्रो दीक्षान्त गरेको विश्वविद्यालयले एक वर्षमै दोस्रो पटक विद्यार्थीलाई दीक्षित गर्न लागेको हो ।

२०६८ मा स्थापना भएको विश्वविद्यालयले ०७१ देखि शैक्षिक कार्यक्रमहरू अघि बढाएको थियो। पहिलो पटक ०७४ मा दीक्षान्त समारोह आयोजना गरेको विश्वविद्यालयले कोरोना संक्रमण लगायत कारणले ५ वर्षपछि असारमा दोस्रो पटक विद्यार्थीलाई दीक्षित गरेको थियो ।

स्नातक र स्नातकोत्तर तहमा ८५५ विद्यार्थीले तह पास गरे पनि १७९ ले मात्रै दीक्षित हुनका लागि आवेदन दिएका छन् । परीक्षा नियन्त्रण कार्यालयले आह्वान गरेको समयभित्र थोरै मात्र विद्यार्थीले आवेदन दिएको विश्वविद्यालयका रजिस्ट्रार यज्ञराज पाठकले बताए ।

उनका अनुसार पुससम्म ट्रान्सक्रिप्ट निकालेका र आवेदन दिएका विद्यार्थी मात्रै दीक्षित हुन पाउँछन। असारमा पनि १५ सय २३ जनामध्ये २५३ ले मात्रै दीक्षितका लागि आवेदन दिएका थिए ।

‘धेरै विश्वविद्यालयको क्षेत्र बाहिर छन्, फेरि दीक्षान्त समारोहमा सहभागी हुने संस्कार पनि विकास भएको छैन,’ विश्वविद्यालयका उपकुलपति प्राध्यापक डा. अम्मराज जोशीले भने, ‘कल्चर बसाउन पनि हामीले चाँडोचाँडो दीक्षान्त समारोह गरिरहेका छौं ।’

विश्वविद्यालयले पठनपाठन सुरु भएको ४ वर्षपछि ०७४ मा पहिलो पटक आयोजना गरेको दीक्षान्त समारोहमा पनि निकै कम विद्यार्थी सहभागी थिए। त्यतिबेला १०४ जना मात्रै दीक्षित भएका थिए ।

यसपटक विश्वविद्यालयका कुलपति एवम् प्रधानमन्त्री पुष्पकमल दाहालले विद्यार्थीलाई दीक्षित गर्ने छन । प्रमुख अतिथि भारत उत्तर प्रदेशको महात्मा ज्योतिबाफुले रुहेलखण्ड विश्वविद्यालयका उपकुलपति केपी सिंह रहनेछन ।

विश्वविद्यालयको केन्द्रीय र आंगिक गरी १६ क्याम्पसमा करिब १५ हजार विद्यार्थी अध्ययनरत छन्। विश्वविद्यालयले इन्जिनियरिङसँगै कृषि, कानुनलगायतका विषयमा समेत अध्यापन गराउँदै आएको छ ।

डडेलधुरामा मेडिकल कलेज सञ्चालनका लागि पनि डिन नियुक्तिसँगै भौतिक पूर्वाधार निर्माणको प्रक्रिया अघि बढाएको छ । सेमेस्टर प्रणालीमा पठनपाठन सञ्चालन गरिरहेको विश्वविद्यालयले वन विज्ञान पढाउने तयारी पनि गरिरहेको छ ।

‘शैक्षिक गतिविधिसँगै औपचारिक र अनौपचारिक कार्यक्रमहरू पनि गरिरहेका छौं,’ उपकुलपति जोशीले भने, ‘दीक्षान्त समारोह पनि छिटोछिटो गर्नुपर्छ भनेर हामी लागेका छौं ।’

विश्वविद्यालयले तीन महिनाअघि मात्रै अन्तर्राष्ट्रिय सम्मेलन आयोजना गरेको थियो । वैशाख पहिलो साता अल्मोडा विश्वविद्यालयको सहकार्यमा कुमाउ र मानसखण्ड क्षेत्रको कला, संस्कृति र रहनसहनबारे सेमिनार आयोजना गरेको थियो । विकल्प दैनिक बाट सभार