पहिरोले दोगडाकेदारमा एक घरमा पूर्ण क्षति, पाँच घर पहिरोको उच्च जोखिममा

लगातारको बर्षाका कारण खसेको पहिरोले बैतडीको दोगडाकेदारमा एक घर पूर्ण रुपमा क्षतिग्रस्त भएको छ । दोगडाकेदार गाउँपालिका २ बसाडमा घरमाथिबाट पहिरो खस्दा स्थानीय देवसिंह महराको घर पूर्ण रुपमा क्षति भएको स्थानीय समेत रहेका एमाले दोगडाकेदारका अध्यक्ष काशीसिंह बिष्टले बताए । महराको घरमा उनका दीदी झापुली नगाइरी बस्दै आएका बताइएको छ ।

आइतबार बिहान १० बजे घरमाथिबाट खसेको पहिरोका कारण गोठमा बाँधेका ३ बाख्रा मरेका छन् भने अन्नपात तथा लत्ता कपडा समेत पुरिएका छन् । दिउँसोको समय भएकाले पहिरोले मानवीय क्षति हुन नपाएपनि घर भने पूर्ण रुपमा क्षतिग्रस्त भएको बिष्टले बताए । पहिरोले घर भत्काएपछि ऐरीलाई उनकै आफन्तको घरमा सारिएको छ ।

पहिरोका कारण घरभित्र रहेको ५ तोला सुन र १० तोला चाँदी समेत पुरिएको बिष्टले बताए । यस्तै सोही ठाउँमा पाँच घर पहिरोको उच्च जोखिममा परेका छन् । स्थानीय मानसिंह महरा, राईसिंह महरा, ध्वज महरा, गणेश महरा र ज्ञानेन्द्र महराको घर पहिरोको उच्च जोखिममा परेका बताइएको छ ।

लगातारको बर्षाका कारण बैतडी सहित सुदूरपश्चिमका विभिन्न स्थानमा बाढी पहिरोको जोखिम बढेको भन्दै सतर्क रहन मौसमविद्ले आग्रह गरेका छन् । सगुन खबर बाट सभार