कञ्चनपुर । कञ्चनपुरमा एचआईभी, क्षयरोग र मलेरिया नियन्त्रणका क्षेत्रमा सञ्चालित कार्यक्रमहरूको कार्यप्रगति समीक्षा र आगामी रणनीति तय गर्ने उद्देश्यका साथ महेन्द्रनगरमा ‘जिल्ला स्तरीय सरोकारवालाहरूको बैठक’ सम्पन्न गरिएको छ।नेपाल राष्ट्रिय समाज कल्याण सङ्घ (एनएनएसडब्लुए), युएनडिपी र ग्लोबल फण्डको संयुक्त साझेदारीमा सञ्चालित ओपिभी माइग्रेन्ट परियोजना र पियुडी परियोजना अन्तर्गत बैठकको आयोजना गरिएको हो।
बैठकमा ओपिभी माइग्रेन्ट परियोजनाकी संयोजक भावना केसीले सन् २०२६ को जनवरी महिनादेखि मे महिनासम्म परियोजनाले गरेका कामहरूको प्रगति प्रतिवेदन प्रस्तुत गर्नुभएको थियो। उहाँले काम गर्ने क्रममा सिकाई र कमजोरीहरू के-कस्ता रहे तथा भविष्यमा कुन-कुन क्षेत्रलाई प्राथमिकतामा राखेर काम गर्ने भन्ने विषयमा सरोकारवालाहरूसँग छलफल गरिएको बताउनुभयो। क्षेत्रगत रूपमा काम गर्दा आइपर्ने चुनौतीहरूलाई न्यूनीकरण गर्न र कार्यक्रमलाई समुदाय केन्द्रित बनाउन सरोकारवालाहरूबाट प्राप्त भएका सुझावका आधारमा अबका दिनमा थप प्रभावकारी ढङ्गले अगाडि बढ्ने उहाँले बताउनुभयो।
बैठकमा पियुडी परियोजनाका संयोजक नवराज पाण्डे लगायत महाकाली प्रादेशिक अस्पताल, जिल्ला प्रशासन कार्यालय, जिल्ला प्रहरी कार्यालय र भीमदत्त नगरपालिका लगायत कञ्चनपुरका प्रमुख सरोकारवाला निकायका प्रतिनिधिहरूको सहभागिता रहेको थियो।
कार्यक्रममा सहभागी विभिन्न सरकारी तथा गैरसरकारी निकायका प्रतिनिधिहरूले परियोजनाहरूले समुदाय स्तरमा पुर्याएको योगदानको प्रशंसा गर्दै आगामी दिनमा आपसी समन्वय र सहकार्यलाई अझ मजबुत बनाएर लैजानुपर्नेमा जोड दिएका छन्।
बैठककमा सहभागी निकायहरूबाट प्राप्त भएका सुझावहरूलाई सङ्कलन गरी आगामी दिनमा कार्यक्रमलाई थप परिमार्जित, व्यावहारिक र प्रभावकारी बनाउने लक्ष्य राखिएको छ।
Discussion about this post