बैतडी – मौसममा आएको परिवर्तनसंगै बैतडीमा भाइरल ज्वरोका बिरामी बढेका छन् । जिल्लाको सबैजसो स्वास्थ्य संस्थामा ज्वरोका बिरामी बढेका बताइएको छ । जिल्ला अस्पतालमा उपचारका लागि पुग्ने बिरामी मध्ये अधिकांश ज्वरोका बिरामी आउने गरेको जिल्ला अस्पतालका सूचना अधिकारी हरिश पन्तले बताए ।
जिल्ला अस्पतालमा दैनिक एक सयको हाराहारीमा बिरामी आउने गरेको ती मध्ये ३० प्रतिशतमा भाइरल ज्वरोको संक्रमण देखिने गरेको पन्तले बताए । अन्यको तुलनामा भाइरल ज्वरोबाट बालबालिकाहरु बढी प्रभावित भएका उनले बताए । उनले भने ‘जिल्ला अस्पतालमा आउने बिरामी मध्ये धेरै जसोमा भाइरल ज्वरोको संक्रमण देखिने गरेको छ ।मौसम परिवर्तनका कारणले यस्तो भएको हुन सक्छ ।’
जिल्लाको तल्लोसोराड क्षेत्रमा पनि भाइरल ज्वरोका बिरामी बढेको केशरपुर प्राथमिक स्वास्थ्य केन्द्रका जनस्वास्थ्य निरीक्षक मुकेशकान्त दयालले बताए । प्राथमिक स्वास्थ्य केन्द्रमा उपचारका लागि पुग्ने अधिकांशमा भाइरल ज्वरोको संक्रमण देखिने गरेको उनले बताए ।
यस्तै जिल्लाको पाटन नगरपालिका र आसपासका क्षेत्रमा पनि भाइरल ज्वरोका बिरामी बढेका पाटन प्राथमिक स्वास्थ्य केन्द्र जनस्वास्थ्य निरीक्षक प्रेमसागर भट्टले बताए ।
मौसममा आएको परिवर्तनका कारण भाइरल ज्वरोको संक्रमण बढेको जिल्ला अस्पताल बैतडीका प्रमुख डा. दिपेश श्रेष्ठले बताए । बर्षातको समयमा दूषित पानी र अन्य कारणले भाइरल ज्वरो हुने भएकाले पानी शुद्धीकरण गरेर मात्रै प्रयोग गर्न उनले सुझाव दिएका छन् । सगुन खबर बाट सभार
Discussion about this post