मधेस प्रदेशका मुख्यमन्त्री लालबाबु राउतले प्रदेशमा रहेका सञ्चारकर्मी र सञ्चारगृहका लागि प्रदेश सरकारले काम गरिरहेको बताएका छन् । शुक्रबार वीरगन्जमा मिडिया काउन्सिलले आयोजना गरेको सञ्चारमाध्यम र पत्रकार आचार संहिता निर्माणसम्बन्धी सुझाव संकलन कार्यशाला गोष्ठीमा बोल्दै मुख्यमन्त्री राउतले बजेटको कमी हुन नदिने प्रतिबद्धा जनाए।
प्रदेशका सञ्चारकर्मी र सञ्चारगृहका लागि प्रदेश सरकारले सुरुदेखि नै धेरै गर्न चाहेको भएपनि विविध कारणले हुन नसकेको स्वीकार्दै उनले भने, ’प्रदेश सरकारबाट केहि कमजोरी पनि भएका छन् । तर ती सबैको जिम्मेवारी मैले मात्र लिन सक्दिनँ, सम्बन्धित मन्त्रालयले पनि लिनुपर्छ । ’
प्रदेश सरकारले मिडिया काउन्सिल र आम सञ्चार प्राधिकरण गठन गरेको बताउँदै मुख्यमन्त्री राउतले दुवै निकायले काम पनि सुरु गरिसकेको बताए । उनले प्रदेशका सञ्चारकर्मी र सञ्चारगृहको वृत्ति विकासका लागि बजेटको कमी हुन नदिने प्रतिबद्धता जनााएका हुन्।
मुलुकमा भएका हरेक राजनीतिक परिवर्तनको आन्दोलनमा मधेशका सञ्चारकर्मीको भूमिका अहम र प्रशंसनीय रहेको पनि उनले बताए । उनले इमान्दारिताका साथ सत्य तथ्य सूचना जनतामाझ सम्प्रेषण गर्न पनि सञ्चारकर्मीहरुसँग आग्रह गरे । मधेस प्रदेशमा कर्मचारी नै थोरै भएको र भएका कर्मचारीले समेत प्रदेश सरकारलाई अटेरी गर्दै आएकाले काम गर्न समस्या भइरहेको गुनासो पनि उनले पोखे ।
मिडिया काउन्सिलका अध्यक्ष शीवहरि प्रसाद भट्टराइको अध्यक्षतामा भएको कार्यक्रममा प्रदेश सरकारका आन्तरिक मामिला तथा सञ्चारमन्त्री भरत साह , आमसञ्चार प्राधिकरणका अध्यक्ष श्याम सुन्दर यादव ,नेपाल पत्रकार महासंघका केन्द्रीय सचिव दिपेन्द्र चौहान , केन्द्रीय सदस्य केसी लामिछाने ,प्रदेश अध्यक्ष राजेश कर्ण ,महासचिव श्याम बन्जारा, पर्सा शाखा अध्यक्ष अनुप तिवारी , बारा शाखा अध्यक्ष रेशम तिवारीका साथै पर्सा , बारा र रौतहट जिल्लाका पत्रकारहरुको सहभागीता रहेको थियो । क्रान्ति शाहले अन्नपूर्ण पोस्टमा लेखेका छन्।
Discussion about this post