कञ्चनपुर । सुदूरपश्चिम विश्वविद्यालयको छैटौँ दीक्षान्त समारोह शुक्रबार सम्पन्न भएको छ। विश्वविद्यालयको केन्द्रीय कार्यालय परिसरमा आयोजना गरिएको उक्त समारोहमा स्नातक, स्नातकोत्तर, एमफिल र विद्यावारिधि (पीएचडी) तह पार गरेका कुल २ हजार ४ सय ८९ जना विद्यार्थीहरू दीक्षित भएका छन्। विश्वविद्यालयका सहकुलपति एवम् शिक्षा तथा खेलकुद मन्त्री सस्मित पोखरेलको अध्यक्षता तथा वरिष्ठ साहित्यकार एवम् शिक्षाविद् प्राध्यापक तुलसीप्रसाद जोशीको प्रमुख आतिथ्यमा विद्यार्थीहरूलाई दीक्षित गरिएको हो।
दीक्षान्त समारोहलाई सम्बोधन गर्दै शिक्षा तथा खेलकुद मन्त्री सस्मित पोखरेलले दीक्षित हुने सम्पूर्ण विद्यार्थीहरूलाई बधाई दिँदै सफल र सुखद भविष्यको कामना गर्नुभएको छ। सुदूरपश्चिम विश्वविद्यालयले स्थापनाको छोटो अवधिमै विश्वविद्यालयले नेपालको उच्च शिक्षाको विकासमा खेलेको भूमिका प्रशंसनीय रहेको उहाँले बताउनुभएको छ।
मन्त्री पोखरेलले विश्वविद्यालयले मानविकी, शिक्षाशास्त्र र व्यवस्थापनका साथै विज्ञान तथा प्रविधि, इन्जिनियरिङ, कम्प्युटर विज्ञान, वन विज्ञान, कृषि विज्ञान, कानुन तथा स्वास्थ्य विज्ञान जस्ता व्यावसायिक र प्राविधिक विषयहरू थप गर्दै लगेकोमा खुसी व्यक्त गर्नुभएको छ। सेमेस्टर प्रणाली लागू गर्ने, आधुनिक प्रविधिको प्रयोग गरी पठनपाठन गर्ने र बजारको माग अनुसारका कार्यक्रमहरू थप गर्ने कार्यले यो विश्वविद्यालय विद्यार्थीहरूको आकर्षणको केन्द्र बन्ने उहाँले विश्वास व्यक्त गर्नुभएको छ।
विश्वविद्यालयले व्यहोरीरहेका समस्याहरूबारे आफू जानकार रहेको उल्लेख गर्दै मन्त्री पोखरेलले ती समस्याहरूको समाधानका लागि प्रयत्न गर्ने आश्वासन दिनुभएको छ। सामुदायिक क्याम्पसहरूको पूर्ण समायोजन लगायतका समस्या समाधान गर्न र सुदूरपश्चिम विश्वविद्यालयको उन्नति, विकासका लागि नेपाल सरकारको तर्फबाट सक्दो सहयोग गर्ने प्रतिबद्धता उहाँले व्यक्त गर्नुभएको छ।
मन्त्री पोखरेलले सुदूरपश्चिम विश्वविद्यालय अन्तर्गत रहेको टीकापुर बहुमुखी क्याम्पसको अतिक्रमित ३ सय बिघा जग्गालाई अतिक्रमणबाट मुक्त गर्ने घोषणा गर्नुभएको छ। यसका साथै विश्वविद्यालय ऐन २०६७ को पूर्ण कार्यान्वयनका लागि सिद्धनाथ विज्ञान क्याम्पसलाई सुदूरपश्चिम विश्वविद्यालयमा समावेश गर्ने र डडेल्धुरामा यथाशीघ्र एमबीबीएसको पठनपाठन सुरु गर्ने वातावरण सिर्जना गर्न डडेल्धुरा अस्पतालको ओएन्डएम पूरा गर्नेतर्फ आफ्नो प्रयास रहने बताउनुभएको छ।
देशको वर्तमान शैक्षिक अवस्था र युवा पलायनप्रति चिन्ता व्यक्त गर्दै मन्त्री पोखरेलले दक्ष र अर्धदक्ष जनशक्ति रोजगारीको खोजीमा बाहिरिनुपर्ने अवस्थालाई बदल्नुपर्ने बताउनुभएको छ। हाम्रा शैक्षिक कार्यक्रमहरू जीवनको आवश्यकतासँग मेल खाने भए कि भएनन् वा सिकेको ज्ञान प्रमाणपत्रमा मात्र सीमित भयो कि भन्नेबारे समीक्षा गर्नुपर्ने बेला आएको उहाँले उल्लेख गर्नुभएको छ।
Discussion about this post