दुनिया लाग्यो धनका पाछा, धरम हरायो

१- देउ छाडि पितर छाडि, जनै जुणि छाड़ि,
धर्म छाड़ि संस्कार छाड़ि, पितर कुणि छाड़ि ।।

२- ईजा छाडि बुवा छाडि,परिवार छाड़ि ,
मया छाड़ि मोह छाड़ि, सत् व्यवहार छाडि ।।

३- सहयोग सत्भाव छाड़ि, बिकृति मौलिनी,
दुनिया लाग्यो धनका पाछा, कि कलि बौलिनी ।।

४- समाजमा मेलमिलाप, आर सार हराई,
येई धन बैरिका लाग्दा, आफन्त लै पराई ।।

५- मान्छेको मानबता हराई, धर्मको नास् गरि,
सत्यको अभाव गरि, कलिको बास् गरि ।।

६- रात सिनु दिन खानु, शुख शान्ति खोसि,
कि कपट गरेई धन, आफुई तिर सोसि ।।

७- आँखरि धन् भण्णु किहो, सुण सुण कुरा,
मुख् मा राम् राम् बगलीमा, हाणिजान्छ छुरा ।।

८- खाईनात कर्मै को खाईन्छ, फाल्दु को बगन्छ,
आफ्छाड़ि दोस्राको धेकी, दुनिया क्याई डगन्छ ।।

१०- जति भ्यालै धन् सम्पति, धो कसै नाईहुनि
नसक्याको खान्याहौकी, आब अर्खि जुनी

११- अजम्बरि कोई हुनैन, एक् दिन मद्दुहो ,
धन् सम्पति याई रन्या हो, आफ् स्वर्ग तद्दुहो ।।

१२- कर्म हुन नीका गद्दा, ईज्जत रैरन्या,
बैकुण्ठमा मुक्ति दिनाई, सत्वमा बैरन्या ।।

१३- चेतन्सिल प्राणिमा, चेतना आथिन,
तबैत पछाडि पड्डा, मनुष्यका दिन ।।

१४- सुर्य हेरि दिन काट्ना, रातका जुन्तारा,
धरति स्वार्थका बटा, कोई छैन साहारा ।।

१५- लोपमा सन्तुष्टि नाईथि, लालच्मा तन् नाईथि,
अहङ्कारमा माया नाईथि, रिषमा मन् नाईथि ।।

१६- दुइ दिनको जिवन काट्नु, ईश्र्वरका भरमा,
सबैले झानुईत पड्ड्या, स्वर्गका घरमा ।।

१७- कसैकि दन रे मण्णि, कसैकि फिनोईछ,
हाँसि खुशि बसौ भायौ, कर्मले दिनोईछ ।।

१८- देउ राख्दु पितर राख्दु, भग्वानलाई धाउनु,
सेवा गरि सत्कार गरि, धरम कमाउनु ।।

१९- समाजमा सहयोगको, भावना पोख्दुहो,
बृद्ध बृद्धा अपाङ्गकी, साहारा भोग्दु हो ।।

२०- बर्ता बर्ता धन नाईहो, धर्म कमाउनुहो,
जिउना सास् धर्ति मर्या स्वर्ग रमाउनुहो ।।

रचना : रमेश भण्डारी आँसु
मेलौली नगरपालिका ०४ तिताबै बामुनि बैतडी