देशभरी एकताको सन्देश दिन फोरम र नयाँ शक्ति मिलेर बनेको नयाँ पार्टी समाजवादी पार्टी नेपालले काठमाडौंसहित देशका प्रमुख आठ सहरहरूमा कार्यक्रम गर्ने भएको छ।
ललितपुरको बालकुमारीस्थित पार्टी केन्द्रीय कार्यालयमा बिहीबार सम्पन्न पदाधिकारीको पहिलो बैठकले देशका प्रमुख ८ सहरमा कार्यक्रम सञ्चालन गर्ने निर्णय गरेको हो।
नवगठित पार्टीका सचिव प्रकाश अधिकारीका अनुसार काठमाडौं, विराटनगर, जनकपुर, वीरगन्ज, भैरहवा, नेपालगन्ज, सुर्खेत र पोखरामा कार्यक्रम गर्ने निर्णय गरिएको हो।
आगामी जेठ ११ गते मोरङको विराटनगरबाट सुरु गरिने कार्यक्रम जेठ २५ गते पोखरामा समापन हुनेछ। कार्यक्रमलाई पार्टी अध्यक्षद्वय बाबुराम भट्टराई र उपेन्द्र यादवले सम्बोधन गर्ने पार्टीले जनाएको छ।
दुवै पार्टीको केन्द्रदेखि वडा तहसम्मै एकीकरण प्रक्रिया टुंगो लगाउन ५ दिनभित्र समायोजन निर्देशिका तयार गर्न समिति समेत गठन गरिएको नेताहरूले बताएका छन्।
![Mahakali Polytechnic](https://sudurpashimkhabar.com/wp-content/uploads/2024/08/Mahakali.gif)
यही वैशाख २३ गते संघीय समाजवादी फोरम नेपाल र नयाँ शक्ति एकीकरण गरी समाजवादी पार्टी बनाइएको हो। उक्त पार्टीले राष्ट्रिय जनता पार्टीसहित विचार र सिद्धान्त मिल्ने अन्य दललाई पनि आफूसँग एकताका लागि अपिल गरेको छ।
![Dirghayu Ads](https://sudurpashimkhabar.com/wp-content/uploads/2024/06/Dirghayu.gif)