बैतडी । जिल्ला भलिबल सङ्घ बैतडीको जिल्ला रेफ्री संयोजकमा राष्ट्रिय रेफ्री धिरज चन्द चयन भएका छन्।
मेलौलीमा बसेको जिल्ला भलिबल सङ्घ बैतडीको बैठकले चन्दलाई जिल्ला रेफ्री संयोजकको जिम्मेवारी दिने निर्णय गरेको हो।
संयोजकमा चयन भएसँगै चन्दले जिल्लामा आयोजना हुने पालिकास्तरीय राष्ट्रपति रनिङ शिल्ड प्रतियोगितालगायत सरकारी तथा गैरसरकारी निकायबाट सञ्चालन हुने विभिन्न भलिबल प्रतियोगितामा रेफ्री परिचालन, खटनपटन तथा व्यवस्थापनको जिम्मेवारी सम्हाल्नेछन्।
जिल्लामा सञ्चालन हुने भलिबल प्रतियोगितालाई व्यवस्थित, मर्यादित र प्रभावकारी बनाउन तथा रेफ्री व्यवस्थापनमा समन्वय कायम गर्न आफूले सक्रिय भूमिका निर्वाह गर्ने चन्दले बताएका छन्।
उनले जिल्ला भलिबल सङ्घलाई थप चलायमान बनाउँदै जिल्लामा भलिबल खेलको विकास र प्रवर्द्धनमा योगदान पुर्याउने उद्देश्यसमेत अघि सारेका छन्। यसका लागि विभिन्न प्रतियोगितामा रेफ्रीका रूपमा काम गर्दा प्राप्त हुने पारिश्रमिकको केही अंश सङ्घको कोषमा जम्मा गर्ने योजना रहेको उनले बताए।
“जुनसुकै प्रतियोगितामा रेफ्री गएर पाउने पारिश्रमिकको केही अंश सङ्घको कोषमा जम्मा गर्ने र त्यसलाई भलिबल विकासका काममा लगाउने मेरो योजना छ। सोहीअनुसार अघि बढ्नेछु,” चन्दले भने।
उनको यो योजनाले जिल्लामा भलिबलसम्बन्धी गतिविधि सञ्चालन गर्न, खेलकुदका कार्यक्रमलाई थप व्यवस्थित बनाउन तथा खेलको विकास र प्रवर्द्धनमा सहयोग पुग्ने अपेक्षा गरिएको छ।
Discussion about this post