जापानतर्फ बढेको आँधीले जनजीवन प्रभावित, सयौँ उडान रद्द

टोकियो । शक्तिशाली समुद्री आँधी ‘डुजुआन’का कारण जापानमा भारी वर्षा र तीव्र हावाहुरी आएको छ। आँधीका कारण सयौँ उडान रद्द हुनुका साथै विभिन्न क्षेत्रमा यातायात प्रभावित भएको छ।

भारी वर्षासँगै टोकियो आसपासका क्षेत्रमा बाढी र पहिरोको जोखिम बढेको छ। केही क्षेत्रमा विद्युत् सेवा अवरुद्ध हुनुका साथै रेल सेवा तथा विभिन्न कार्यक्रमसमेत प्रभावित भएका छन्।

जापानी अधिकारीहरूले प्रभावित क्षेत्रका बासिन्दालाई सुरक्षित स्थानमा जान आग्रह गरेका छन्। मौसम अधिकारीहरूले थप भारी वर्षा र केही क्षेत्रमा कीर्तिमानी वर्षाको सम्भावना रहेको चेतावनी दिएका छन्।