कञ्चनपुर । रसुवाको भोटेकोशी नदीमा आएको बाढीबाट प्रभावित परिवारका लागि कञ्चनपुरका युवाहरूले संकलन गरेको राहत सामग्री पठाइएको छ । महेन्द्रनगर र दोधारा चाँदनीका युवाहरूले संयुक्त रूपमा खाद्यान्न, कपडा, त्रिपाल, सेनेटरी सामग्री, मेडिकल किटलगायत आवश्यक सामग्री संकलन गरी एकमुष्ट पठाएका हुन् ।
युवाहरूले बाढी प्रभावित परिवारका लागि झण्डै ४० लाख रुपैयाँ बराबरको राहत सामग्री संकलन गरेको बताएका छन् । बाढीपीडितलाई तत्काल सहयोग पुगोस् भन्ने उद्देश्यले राहत संकलन अभियान सञ्चालन गरिएको उनीहरूले बताएका छन् ।
राहत सामग्री काठमाडौंसम्म पुर्याउन गएका युवा ईश्वर भट्टका अनुसार संकलित सामग्री विपद् प्रतिकार्य तथा तालिम केन्द्रमा बुझाइएको छ । त्यहाँबाट आवश्यकताका आधारमा रसुवाका बाढी प्रभावित क्षेत्रमा सामग्री पठाइनेछ ।
बाढीपछि प्रभावित परिवारलाई तत्काल खाद्यान्न, लत्ताकपडा, त्रिपाल, सरसफाइ तथा महिलाका लागि आवश्यक सामग्रीको आवश्यकता रहेकाले सोहीअनुसार राहत संकलन गरिएको युवा दुर्गा बडुवालले बताइन् ।
उत्थानसिल युवा संजाल, पावर अफ युथ, प्ले क्लिन नेपाल, यस टु ब्रदरहुड लगायतका स्वतन्त्र युवा सञ्जालहरूले स्वस्फुर्त रूपमा राहत संकलन गरेका थिए।
बाढीपछि प्रभावित क्षेत्रमा राहतको आवश्यकता बढिरहेका बेला संकलित सामग्री एकै ठाउँमा थुपारेर राख्नुभन्दा वास्तविक पीडितको पहिचान गरी समयमै वितरण गर्नुपर्ने युवाहरूको भनाइ छ । प्रभावित परिवारको तत्काल आवश्यकता पहिचान गरी सोहीअनुसार राहत परिचालन गर्नुपर्ने उनीहरूले बताएका छन् ।
युवाहरूले राहत वितरणसँगै उद्धार तथा पुनर्स्थापनाको कामलाई पनि प्रभावकारी बनाउन सरकार संवेदनशील भएर लाग्नुपर्ने बताएका छन् । स्थानीय प्रशासन, सुरक्षा निकाय तथा नागरिकस्तरबाट भइरहेको प्रयासलाई एकीकृत गर्दै प्रभावितसम्म सहयोग पुर्याउन सके राहत वितरण थप प्रभावकारी हुने उनीहरूको भनाइ छ ।
Discussion about this post