काठमाडौं । संयुक्त राष्ट्रसंघको ८१औँ महासभा अधिवेशन अमेरिकाको न्यूयोर्कस्थित संयुक्त राष्ट्रसंघको मुख्यालयमा औपचारिक रूपमा सुरु भएको छ।
संयुक्त राष्ट्रसंघ महासभाका नवनिर्वाचित अध्यक्ष खलिलुर रहमानले अधिवेशनको उद्घाटन गरेका हुन्। उद्घाटनका क्रममा अध्यक्ष रहमानले विश्वका विभिन्न क्षेत्रमा जारी द्वन्द्व, विकासका उपलब्धिमा देखिएको कमजोरी तथा अस्थिरता र जलवायु परिवर्तनका बढ्दो असरले विश्वसामु गम्भीर चुनौती सिर्जना गरेको बताए।
यी चुनौतीका कारण बहुपक्षीयताप्रतिको विश्वासमा दबाब बढिरहेको उल्लेख गर्दै उनले अन्तर्राष्ट्रिय संस्था तथा सामूहिक प्रयासप्रतिको विश्वास पुनर्स्थापित गर्न संवाद, सहकार्य र प्रभावकारी कामलाई प्राथमिकता दिनुपर्नेमा जोड दिए।
८१औँ महासभाको मुख्य विषय ‘विश्वास पुनर्स्थापना, रूपान्तरण व्यवस्थापन, सबैका लागि परिणाम दिने संयुक्त राष्ट्रसंघ’ तय गरिएको छ।
यसैबीच, संयुक्त राष्ट्रसंघका महासचिव एन्टोनियो गुटेरेसले पनि विश्वसामु रहेका प्रमुख चुनौतीप्रति ध्यानाकर्षण गराएका छन्। उनले द्वन्द्व र विभाजन, आणविक तनावको जोखिम, गरिबी तथा असमानता, बढ्दो जलवायु संकट र कृत्रिम बुद्धिमत्ताबाट सिर्जित अवसर तथा जोखिमलाई प्रमुख चुनौतीका रूपमा औँल्याएका छन्।
त्यस्तै, दिगो विकासका लक्ष्य हासिल गर्ने दिशामा भइरहेको सुस्त प्रगतिप्रति समेत महासचिव गुटेरेसले चिन्ता व्यक्त गरेका छन्।
८१औँ महासभामा विश्वका विभिन्न मुलुकका प्रतिनिधिले अन्तर्राष्ट्रिय शान्ति तथा सुरक्षा, विकास, जलवायु परिवर्तन, बहुपक्षीय सहकार्य र विश्वव्यापी चुनौतीका विषयमा छलफल गर्नेछन्।
Discussion about this post