कञ्चनपुर । सामुदायिक वन दिवस २०८३ को अवसरमा कञ्चनपुरमा वृक्षारोपण कार्यक्रम आयोजना गरिएको छ। डिभिजन वन कार्यालय कञ्चनपुर, ब्रह्मदेव सब–डिभिजन वन कार्यालयअन्तर्गतका सामुदायिक वन उपभोक्ता समूह, चुरे संरक्षण सञ्जाल, कञ्चनपुर–शुक्लाफाँटा मध्यवर्ती क्षेत्र व्यवस्थापन समिति तथा नेपाल राष्ट्रिय समाज कल्याण संघ (एनएनएसडब्ल्यूए) र डीसीए नेपालको साझेदारीमा सञ्चालित सुदृढ परियोजनाको संयुक्त आयोजनामा सोमबार वृक्षारोपण गरिएको हो।
भीमदत्त नगरपालिका–११ स्थित सुख्खा बन्दरगाह जोड्ने सडकखण्ड (भाइरल रोड) किनारमा गरिएको वृक्षारोपणमा यसअघि लगाइएका बिरुवा नलागेका तथा खाली रहेका स्थानमा नयाँ बिरुवा रोपिएको छ।
कार्यक्रममा डिभिजन वन कार्यालय कञ्चनपुरका प्रमुख (डीएफओ) लक्ष्मीराज जोशीले वन संरक्षणसँगै सडक तथा सार्वजनिक क्षेत्रको हरियाली प्रवर्द्धनमा वृक्षारोपणको महत्त्व रहेको बताए। त्यस्तै जिल्ला समन्वय समिति कञ्चनपुरका प्रमुख दुर्गा बोहोराले वृक्षारोपणसँगै रोपिएका बिरुवाको संरक्षण र हुर्काउने जिम्मेवारीमा पनि ध्यान दिनुपर्ने बताए।
भीमदत्त नगरपालिका–११ का वडाध्यक्ष प्रकाश थापाले सार्वजनिक सडक आसपासको वातावरण संरक्षण तथा हरियाली विस्तारका लागि वृक्षारोपण अभियानलाई निरन्तरता दिनुपर्ने बताए। सुदृढ परियोजनाका संयोजक राजकुमार सुनारले वातावरण संरक्षण तथा जलवायुजन्य जोखिम न्यूनीकरणका लागि स्थानीय समुदायको सहभागितामा वृक्षारोपण तथा संरक्षणका गतिविधि सञ्चालन गर्दै आएको बताए।
वृक्षारोपण कार्यक्रममा विभिन्न सामुदायिक वन उपभोक्ता समूहका पदाधिकारी तथा सदस्य, स्थानीय जनप्रतिनिधि, वनकर्मी, चुरे संरक्षण सञ्जाल, मध्यवर्ती क्षेत्र व्यवस्थापन समिति, एनएनएसडब्ल्यूए, उत्थानशील युवा सञ्जालका प्रतिनिधि तथा स्थानीयको सहभागिता रहेको थियो।
वृक्षारोपणसँगै रोपिएका बिरुवाको संरक्षण र नियमित हेरचाहमा स्थानीय समुदाय तथा सम्बन्धित निकायले सहकार्य गर्ने जनाइएको छ।
Discussion about this post