पहिलो भेटका ती सबै बहाना भुलिदेउ,
मनभित्र उम्रिएका ती सबै चाहना भुलिदेउ।
अन्जान बाट शुरु हुदै आफ्नै बनेको यो सम्बन्ध,
लाजले बोलेका ति मीठा भावना भुलिदेउ
मेरो प्रेम, स्पर्श, अनि न्यानो अङ्गालोको ताप,
हातमा बाँचेका ती मनका कामना भुलिदेउ।
एक झल्को हेर्नलाई बाटो कुरेका आँखाहरू,
पर्खाइमा भोगेका ती सबै यातना भुलिदेउ।
छुट्टिँने बेला रसाएका मेरा र तिम्रा परेला,
आँसुले लेखिदिएका ती पुराना चाहना भुलिदेउ।
अनिन्द्राले लुटेका ती रातका सबै कथाहरु,
सपनामा जागेका ती चिसा जमाना भुलिदेउ।
यदि कहिल्यै मेरो नाम ओठसम्म आएछ भने,
बोल्नुअघि त्यस्ता नमिठा सम्झना भुलिदेउ।
म त सम्झिएर पनि तिम्रो मन दुखाउन सक्नेछैन,
सक्छौ भने ‘विवेक’का सबै वेदना भुलिदेउ।
– ई. बिबेक पन्त
Discussion about this post