नेपाल–डेनमार्क द्विपक्षीय परामर्श संयन्त्रको तेस्रो बैठक काठमाडौंमा सम्पन्न भएको छ। बैठकमा दुई देशबीचको द्विपक्षीय सम्बन्ध, विकास सहकार्य तथा आपसी हितका विभिन्न विषयमा छलफल गरिएको परराष्ट्र मन्त्रालयले जनाएको छ।
बैठकको सह–अध्यक्षता परराष्ट्र मन्त्रालयको युरोप महाशाखाका प्रमुख तथा सहसचिव गणेशप्रसाद ढकाल र डेनमार्कको परराष्ट्र मन्त्रालयअन्तर्गत एसिया, ओसियानिया, ल्याटिन अमेरिका तथा क्यारिबियन विभागका निर्देशक क्रिस्टियन टोबियास बायर टाइगेसनले गरेका थिए।
नेपाली प्रतिनिधिमण्डलमा परराष्ट्र मन्त्रालय तथा विभिन्न क्षेत्रगत मन्त्रालयका अधिकारीहरूको सहभागिता रहेको थियो। डेनमार्कको प्रतिनिधिमण्डलमा नेपालका लागि डेनमार्कका गैरआवासीय राजदूत रास्मुस अबिल्डगार्ड क्रिस्टेन्सेनसहित नयाँ दिल्लीस्थित डेनमार्क दूतावासका अधिकारीहरू सहभागी थिए।
बैठकमा दुवै पक्षले सन् १९६७ मा कूटनीतिक सम्बन्ध स्थापना भएयता नेपाल र डेनमार्कबीच कायम रहेको मैत्रीपूर्ण सम्बन्धको समीक्षा गरेका थिए। साथै, सन् २०२७ मा नेपाल–डेनमार्क कूटनीतिक सम्बन्ध स्थापनाको ६०औँ वार्षिकोत्सव संयुक्त रूपमा मनाउने सहमति पनि भएको छ।
छलफलका क्रममा सुशासन, पारदर्शिता, दिगो विकास, लोकतान्त्रिक मूल्य तथा आपसी हितका क्षेत्रमा सहकार्यलाई थप सुदृढ बनाउने विषयमा दुवै पक्षले प्रतिबद्धता व्यक्त गरेका छन्।
बैठकलाई नेपाल–डेनमार्क सम्बन्धलाई अझ प्रगाढ बनाउने तथा आगामी सहकार्यका क्षेत्र पहिचान गर्ने महत्वपूर्ण अवसरका रूपमा हेरिएको छ।
Discussion about this post