कञ्चनपुर । कञ्चनपुरको भीमदत्त नगरपालिकामा ‘आपतकालीन पूर्वतयारी तथा प्रतिकार्य योजना’ अध्यावधिक सम्बन्धी नगर स्तरीय बैठक सम्पन्न भएको छ।
भीमदत्त नगरपालिकाको आयोजनामा तथा नेपाल राष्ट्रिय समाज कल्याण सङ्घ (एनएनएसडब्लुए) र डीसीए नेपालद्वारा संयुक्त रूपमा सञ्चालित ‘सुदृढ’ परियोजनासहित निडस नेपाल, पेसवान, प्राक्टिकल एक्सन र सञ्जीवनी नेपालको प्राविधिक तथा संस्थागत सहकार्यमा बैठक आयोजना गरिएको हो।
बैठकमा भीमदत्त नगरपालिकाका उप-प्रमुख निलम लेखक जोशीले मनसुनजन्य विपद्को जोखिम न्यूनीकरण गर्न र नागरिकको सुरक्षा सुनिश्चित गर्न समयमै पूर्वतयारी योजना अध्यावधिक गर्नु अपरिहार्य रहेको बताउनुभयो। उहाँले सम्भावित बाढी र डुबान जस्ता जोखिमबाट नगरबासीलाई समयमै जोगाउन र संकटका बेला तत्काल उद्धार एवम् राहत टोली परिचालन गर्न यो योजनाले मार्गचित्र प्रदान गर्ने बताउनुभयो।
त्यसैगरी सुदृढ परियोजनाका संयोजक राजकुमार सुनारले भीमदत्त, दोधाराचाँदनी, वेदकोट र परशुराम नगरपालिकाको प्रत्येक वर्ष डिपिआरपी र इपिआरपी अध्यावधिक गर्ने गरिएको र यस वर्ष पनि मनसुन आगमन अगावै यी चारवटै पालिकामा उक्त कार्य सम्पन्न गर्ने लक्ष्यका साथ टोली क्रियाशील रहेको जानकारी दिनुभयो। उहाँले जलवायु परिवर्तनका कारण विपद्को स्वरूप फेरिँदै गएकाले स्थानीय विपद् व्यवस्थापन समितिलाई थप चनाखो र पूर्वतयारीमा बलियो बनाउन यस्ता योजनाहरूलाई समयसापेक्ष परिमार्जन गर्न आवश्यक रहेको बताउनुभयो।
बैठकमा सुदृढ परियोजनाका वातावरणविद् भोजराज भट्टले नेपाल सरकारद्वारा विपद् व्यवस्थापन तथा उद्धारका सम्बन्धमा जारी गरिएका विद्यमान ऐन, कानुन र नीतिगत व्यवस्थाहरूबारे प्रस्तुतीकरण गर्नुभयो। त्यस्तै प्रभु निधि पन्तले भीमदत्त नगरपालिकाका लागि तयार पारिएको आपतकालीन पूर्वतयारी योजनाको मस्यौदा बैठकमा प्रस्तुत गर्नुभएको थियो।
नगरपालिकाका विपद् सम्पर्क व्यक्ति मनोज प्रसाद भट्टले सञ्चालन गर्नुभएको उक्त कार्यक्रममा विभिन्न वडाका जनप्रतिनिधि, कार्यपालिका सदस्य, विषयगत शाखा प्रमुख तथा विपद् व्यवस्थापनको क्षेत्रमा क्रियाशील संघ-संस्थाका प्रतिनिधिहरूको उपस्थिति रहेको थियो।
Discussion about this post