कञ्चनपुर । विश्व वातावरण दिवसका अवसरमा कञ्चनपुरको सबैभन्दा बढी बाढी जोखिमयुक्त मानिने दोधाराचाँदनी नगरपालिका वडा नम्बर १० स्थित कुतियाकबरमा बाढीको कृत्रिम घटना अभ्यास गरिएको छ। मनसुन भित्रिनै लाग्दा समुदायलाई सम्भावित जोखिमबाट बचाउन र पूर्वतयारी अवस्थामा राख्न कुतियाकबर सामुदायिक विपद् व्यवस्थापन समितिको आयोजनामा उक्त अभ्यास गरिएको हो।
दोधाराचाँदनी नगरपालिकासँगको समन्वय तथा नेपाल राष्ट्रिय समाज कल्याण संघ (एनएनएसडब्लुए) र मर्सीकोर नेपालको साझेदारीमा सञ्चालित ‘समुदायका लागि जलवायु उत्थानशील (सिआरसी)’ परियोजना, एनएनएसडब्लुए र डिसिए नेपालद्वारा सञ्चालित ‘सुदृढ’ परियोजना र निड्स नेपालको प्राविधिक सहकार्यमा कृत्रिम घटना अभ्यास गरिएको हो।
वर्षेनी मनसुन सुरु भएसँगै बाढीको त्रासमा रहने यस क्षेत्रमा महाकाली नदी र जगबुडा नदीका कारण डुबान र कटानको जोखिम उच्च रहने गर्दछ। बाढी आएको अवस्थामा बाह्य सहयोग पुग्नु अगावै समुदाय स्तरमै तत्काल कसरी खोज तथा उद्धार गर्ने, सूचनाको आदानप्रदान कसरी चुस्त राख्ने र सुरक्षित आश्रयस्थलसम्म कसरी पुग्ने भन्ने विषयलाई व्यावहारिक रूपमा प्रदर्शन गर्न स्थानीय बासिन्दा आफैँ सक्रियताका साथ पूर्वअभ्यासमा जुटेका थिए।
कुतियाकबर सामुदायिक विपद् व्यवस्थापन समितिकी सचिव बसन्ती सुनारले आफू र आफ्नो समुदायलाई बाढी जस्तो विपद्को बेला कसरी सुरक्षित राख्ने, पूर्वसूचनाहरू कसरी समयमै सम्बन्धित ठाउँमा पुर्याउने, कोसँग समन्वय गर्ने, कसरी प्रतिकार्य गर्ने तथा सुरक्षित स्थानमा कसरी बस्ने लगायतका बारेमा समुदायलाई सचेत गराउन अभ्यास निकै प्रभावकारी रहेको बताउनुभयो। उहाँले विगतका वर्षहरूमा पनि यस्ता अभ्यासहरू गर्दै आएको स्मरण गर्दै यस वर्ष पनि मनसुनको पूर्वसन्ध्यामा गरिएको कृत्रिम अभ्यासले वर्षेनी बाढीको त्रासमा रहने कुतियाकबरबासीको आत्मविश्वास र पूर्वतयारीलाई अझ बलियो बनाएको बताउनुभयो।
सिआरसी परियोजनाका संयोजक महेश घिमिरेले दोधाराचाँदनी नगरपालिका आफैँमा विपद्को उच्च जोखिममा रहेको पालिका भएको र त्यसमा पनि कुतियाकबर बस्ती वर्षेनी महाकाली र जगबुढा नदीको बाढीका कारण प्रत्यक्ष प्रभावित हुने गरेको बताउनुभयो। बाढी आइसकेपछि अत्तालिनु भन्दा आउनु अगावै समुदायलाई मानसिक र व्यावहारिक रूपमा तयार राख्न कृतिम घटना अभ्यास गरिएको उहाँले बताउनुभयो।
यसैगरी, वातावरण दिवसकै अवसर पारेर महाकाली तटीय क्षेत्रमा व्यापक वृक्षारोपण समेत गरिएको संयोजक घिमिरेले जानकारी दिनुभयो। उहाँले तराईका जिल्लाहरूमा वर्षेनी तापक्रम तीव्र रूपमा वृद्धि भइरहेको र जल तथा मौसम विज्ञान विभागको तथ्याङ्क अनुसार कञ्चनपुरका पालिकाहरूमध्ये दोधाराचाँदनी नगरपालिकामा तातो हावाको लहरको सम्भावना सबैभन्दा बढी रहने देखिएकाले जोखिम न्यूनीकरणका लागि वृक्षारोपण अभियानलाई पनि जोड दिइएको बताउनुभयो।
बाढीको कृत्रिम घटना अभ्यासमा दोधारा चाँदनी नगरपालिकाका विपद् सम्पर्क व्यक्ति अमृत बिक, जनप्रतिनिधि, सुरक्षा निकायका प्रतिनिधि, सामुदायिक विपद् व्यवस्थापन समितिका सदस्यहरू लगायत सरोकारवालाहरूको उपस्थिति रहेको थियो।
Discussion about this post