सभापति थापाको उच्चतम् राजनीतिक नैतिकता : नेता मिश्र

काठमाडौं । नेपाली कांग्रेसका सभापति गगन थापाको राजीनामाबारे टिप्पणी गर्दै नेता मनिष मिश्रले उच्चतम् राजनीतिक नैतिकता भन्दै प्रशंसा गरेका छन् ।
नेता मिश्रले सभापति थापाको राजीनामा यो उच्चत्तम राजनीतिक नैतिकता रहेको बताएका हुन् । उनले भनेका छन्, ‘हुनत गगनजी सभापति भएपछि चुनावी तयारीका निम्ति तयारी समय अति नै अपुग थियो । विषम् परिस्थिति थियो ।’
उनले पार्टीका साथीहरूसँग खुलेरै कुरा गर्ने र चुनावी छलफलसम्म गर्न पाएको अवस्था नरहेको टिप्पणी गर्दै भने, ‘तथापी चुनावी सभालाई सम्बोधनदेखि चुनावी रैलीसम्म कुरा प्रशंसा योग्य थियो । परिणाम जुन आयो त्यो पनि विषम् परिस्थितिमा गगनजी, बिश्वजी लगायतको टिमलाई हेरेर आएको हो नत्र के हुन्थ्यो भन्न सकिन्नथ्यो ।’
उनले सभापति थापा राजिनामा नै दिनुपर्ने अपरिहार्यता नरहेको जिकिर गरेका छन् । उनले अझ मजबुतिका साथ काम गर्नुपर्ने काँग्रेसीजनको बुझाई रहेको बताए । ‘तर गगनजी शायद उहाँले आफ्नो सिद्धान्तविपरीत जान सक्नु भएन । साथीहरूले राजिनामा नदिनुस् भन्दा उकुसमुकुसमा परेको अनुभुति मैले बुझेको छु,’ उनले भने ।
नेता मिश्रले भनेका छन्, ‘निर्वाचन परिणामको पहिलो दिन नै राजीनामा दिन्छु भन्दा एक दुई दिन पर्खिनुस् भनेर केन्द्रीय समितिका साथीहरूले नदिलाउने सोचमा थिए । गगन थापा नैतिकवान नेता हो सायद वहाँलाई चित बुझेन र राजीनामा दिएरै छाड्नु भयो ।’
उनले अब केन्द्रीय समितिले सभापतिमा गगनजीको खाँचो छ भने निर्णय अनुमोदन नगर्दा बेस हुने धारणा राखेका छन् ।
उनले गगनजी बाहेकको कांग्रेसको परिकल्पना अहिलेको समयमा गर्दा काँग्रेसको लागि ठूलो क्षति हुने बताएका छन् । अबको दिनमा काँग्रेस स्पष्टधारका साथ प्रतिपक्षको भुमिकामा आफूलाई जनपक्षीय कार्यमा ल्याउनु पर्ने भन्दै त्यसका लागि गगनको अपरिहार्यता रहेको ठहर गरेका छन् ।